2020-01-01

1.6K

畀小朋友獨自落街=訓練獨立?JM:出咗事點算?

「養兒100歲,長憂99。」相信係唔少父母嘅心聲,特別係呢個年代,大部份人都選擇「一孩政策」,將所有心機同時間都投放晒喺一個小朋友身上,可以話係從頭到腳咩都呵護備至,之但係父母又應該「呵護」到佢幾多歲?莫非要上到大學都仲幫佢著衫、餵佢食飯?如果你覺得呢個比喻太誇張,咁坊間流傳好多口耳相傳嘅「帶阿媽見工」故事,又會唔會係令你感到嘖嘖稱奇?

要訓練小朋友獨立,可以話係作為父母好重要嘅一課,唔想自己嘅仔女成為人稱嘅「廢青」,首先父母就要學放手!最近就有JM糾結緊應唔應為咗訓練小朋友獨立,而比佢試下自己落街買嘢,各位網民都眾說紛紜,不過似乎都唔太同意呢個做法:

「女仔我唔會,公屋環境更加唔會。獨立唔一定要咁樣訓練。」

「我會提議先教小朋友學做簡單家務,例如洗碗,吸塵,洗衣機洗衫 + 晾衫 + 摺衫。」

「自行落街買嘢,唔覺得需要特別訓練!」

「最怕途中有變態佬捉個小朋友去啫,其實11,12歲先都未遲,起碼有壞人跑都得快啲。」

討論區熱話:想訓練小朋友獨立

其實要培養小朋友獨立自律,除咗畀佢哋自己獨自行動,都仲有好多方法,但首先係父母要學識相信小朋友能力,唔好咩都擔心佢哋做得唔好,小朋友先可以有機會從錯誤中學習。

國外有好多研究發現,從小協助做家事嘅小朋友,長大之後,都比較獨立,而且思維亦較為正向,所以喺考慮訓練小朋友獨立嘅時候,家長或者可以從「做家務」入手,同時培養個人責任感。

如果下下都諗住佢唔識、做唔好、幫住先,只會令小朋友不願獨立,永遠留戀父母嘅愛護之中。

若然都仲係有憂慮,家長可以選擇以示範形式,向小朋友口述,或者親身做一次,等佢睇住嚟學,喺嘗試過程中,給予指引同鼓勵,例如:「爸爸媽媽相信你,你可以做得到!」,唔好輕易就容許小朋友放棄,或者出手相助,咁樣只會令小朋友覺得自己能力有限,加重依賴心!

討論區熱話:想訓練小朋友獨立

【編按:以上內容為作者之個人意見及立場】

相關文章

【筋肉寶寶養育記26M】媽媽秒懂!媽咪照顧小朋友後的多方面技能!

成績再好亦不及品德重要 媽媽心聲:「唯一重視佢哋有冇感恩嘅心! 」

【筋肉寶寶養育記21M】我100%中了BB毒,各位爸媽又中了多少?

【筋肉寶寶養育記19M】父母BB大作戰,令BB訓得更好!

緊貼新冠肺炎最新相關資訊