2018-12-24

7.7K

【小朋友必問:真係有聖誕老人?】童心網民家長咁樣答⋯

聖誕節係小朋友最鍾意嘅節日,學校又有Party,又係9月開學以黎放第一個長假。呢幾日放假開始日日對住小朋友,就知道佢哋幾期待聖誕節,日日問住幾時有聖誕禮物!

小朋友都曾經相信,聖誕老人會喺平安夜揸住鹿車,靜雞雞咁派禮物畀家家戶戶。小朋友第二朝瞓醒,自然會收到聖誕老人派嘅禮物⋯長大後嘅我哋都知,聖誕老人其實只係童話故事,就算有禮物,都只係阿爸阿媽送嘅。而家做咗父母,由收禮物變咗做聖誕老人派禮物。

呢個永恆嘅童話當然唔會失傳啦,不過香港細路咁老積,細細個就十八般武藝,成日畀人話無童真,唔知佢哋幾多歲先唔信有聖誕老人呢?有網民就發起一個 你的小朋友, 幾多歲先唔信世上有聖誕老人? ...」討論,原來一班細路都仲有保留一絲童真。

有位媽咪話個仔7歲仲好信有聖誕老人,皆因兩年前聖誕老人送咗隻船畀佢(其實即係阿媽送),之不過呢兩年都無再收過,以為自己唔乖,所以聖誕老人唔送畀佢,講講下仲喊咗出嚟!

呢顆童心,家長當然好想一直幫小朋友保留住啦,之但係如果有同學爆響口,同佢講係假嘅,家長又可以點拆解呢?!媽媽們就有以下回應,大家可以參考吓:

聖誕老人代表 

「我係代表聖誕老人派禮物嘅,佢好忙!」

最容易解畫、最常見嘅答案!

芬蘭的確有聖誕老人

「認真同佢講聖誕老人住係芬蘭,上網搵聖誕老人村嘅相畀佢睇。」

呢個真係實實在在嘅證據,成班聖誕老人全年都喺芬蘭返工,咁都有得假嘅?!

信則有不信則無

「你信就有㗎啦,佢哋唔信佢哋事。」

聽起上黎好似靈異事件,但其實又好有道理!教小朋友面對同自己信念唔同嘅睇法就係要相信自己,各人有各人立場,唔需要動氣,大可以和而不同。

講到尾,我覺得小朋友保持童真、希望同想像力都唔錯吖,家長呢份扮聖誕老人送禮物嘅心思,相信小朋友大個記起都會暖在心頭!

【編按:以上內容為作者之個人意見及立場】

相關文章

【聖誕禮物推介】樂施有禮!一份有意義的禮物 6大窩心之選!

最健康的新年禮物!大家減齡免費換$4000體檢 健康迎接新一年

疫下聖誕仍窩心!校長不忍無Party 親自送禮物到學生家

【疫情下的聖誕】子女安在家中慶祝!多間學校聖誕聯歡會改為網上虛擬派對

緊貼新冠肺炎最新相關資訊