智能電話、平板電腦、電視等電子產品喺今時今日已經係不可或缺嘅必需品，好多人甚至會機不離手，但如果呢個情況發生喺仔女身上，又係咪一件好事？
網上討論區就有不少父母有呢個問題，近期更有樓主分享，因為仔仔年紀仲細，平時已經盡量唔俾電子產品佢哋用，最多只會影完相俾返小朋友睇，希望仔仔唔會成為手機上癮患者，但點知防不勝防，校車姨姨每次喺仔仔喊嘅時候就會拎電話俾佢玩，搞到仔仔係屋企都成日話要玩電話，搞到樓主又嬲又無奈！
面對呢種情況，好多時都唔知點算好，因為現實生活中，又點止一個「校車姨姨」，四大長老、工人姐姐同身邊嘅朋友都係一個好大嘅隱憂，所以家長嘅管教同溝通就變得極為重要。
討論區熱話：校車姨姨令到我小朋友玩手機
相關文章：小學3年級想要手機做獎勵？網民 : 比咗好難收返！
電子產品影像千變萬化，功能日新月異，對小朋友嚟講確實極為吸引，所以每次仔女扭計喊爆個陣，一見到電子產品就會即刻收聲，乖乖坐定。不過近年有唔少研究指出，若小朋友長期接觸電子產品，將會影響其腦部發展，例如語言、讀寫、認知同自我控制等學習能力會因此下降等，真係唔可以掉以輕心。咁究竟要點樣做先好？不妨從以下呢三點做起！
- 制定有限度的電子產品使用時間
每日使用電腦、平板電腦或智能電話等嘅累積時間，應限制在1小時內。仔女使用電子產品時亦要陪伴在側，並就電子產品顯示嘅內容同仔女作出互動及指導。 - 以身作則
家長要留意自己有無沉迷使用電子產品嘅習慣，例如同仔女相處時唔好長期開著電視，唔好機不離手等。不妨試下食飯時或同仔女玩樂嗰陣，將所有電子產品收起關閉，樹立良好榜樣。 - 堅定一致
限制仔女每次可使用電子產品嘅時間，並堅定一致去執行，唔好因為仔女扭計就心軟俾佢哋繼續使用。
其實唔係話仔女完全唔可以接觸電子產品，只要注意以上事項，就可以滿足到小朋友之餘，又唔怕佢哋「玩壞腦」啦！
