攪笑仔仔煮麵記

依個百厭豬今日又有新搞作，佢玩煮飯仔時已經不甘於煮啲假食物，入咗廚房拎麵條話煮麵我食，見到真係唔知好嬲定好笑呀！自從上次洗地事件之後，每逢小小豬有新奇舉動時，我哋都會放手等佢自由發揮一下。今次當然都唔例外，我企埋一邊睇吓佢做乜啦！

小小豬話：先嚟切麵條~

小小豬又幾節制，只係用咗兩條小麵條，佢話足夠啦！

開始煮麵啦~

諗吓一碗麵要煮幾耐先~

煲吓佢先~

好嘢~ 煮好啦~

雖然玩食物好似有小小浪費，不過我覺得依兩條麵條浪費得值得，因為可以畀我知道小小豬又再大個仔咗啲啲，學識嘅嘢又多咗啦！

今日小小豬嘅表現，真係估佢唔到，小小豬又出奇地玩得好斯文，一條一條麵條咁拎出嚟，仲主動咁話兩條就足夠。

玩嘅時候又好認真同專心，同埋佢真係好似有文有路，真係好似係度煮緊麵咁，可能平日成日入廚房陪我煮嘢，所以觀察得到個程序啦！

其實我覺得小小豬個觀察同模仿力都幾強，好多時日常生活中我地都冇乜點教過佢嘅事/說話，佢突然間又會彈出嚟，有時都真係幾喜出望外，內心都有點點笑呀！不過，亦都因為咁，我地平日嘅言行舉止都一定要更加小心，做一個好榜樣，身教嘛！

除此之外，我覺得應該俾多啲機會小小豬自由發揮，自由創作，接觸多啲唔同種類嘅事物，咁等佢自己從日常生活中學習，相信對小小豬都會有更大幫助。