【悠閒與精彩兼並】三日兩夜澳門親子遊

每次到澳門玩，都總會覺得意猶未盡。今次一於加碼，實行玩足三日兩夜，滿足度應該大增喇掛？

我哋將會入住兩間感覺完全唔同嘅酒店，行程都會隨著酒店唔同嘅風格而有所不同。可以話係悠閒寫意同精彩豐富兼並，大人同細路都一樣咁啱玩！不過今次過澳門除咗玩之外，其實仲有一個目的，就係為澳門打打氣喇！一向喜愛澳門嘅我哋，見到澳門被颱風吹襲過後陸續恢復，都感到安慰呀！事不延遲，馬上開展我哋嘅三日兩夜澳門之旅囉！

晨早9:00船過大海，個個都精神奕奕。一落船又例牌攞咗啲擦擦咭，發現而家啲宣傳品越做越精美，成條鎖匙都做到出嚟！唔知係送車定送樓呢？XD

趁住搭Shuttle期間，立即換咗響碼頭買嘅電話卡先！$50已經足夠三日用喇！

第一站係「新濠影滙」，十分熟悉嘅氣味！已經嚟過兩次喇！而我哋今次又嚟做咩？唔係做住客喇！特別嚟睇「Our SANRIO TIMES」展覽㗎！

由細到大，都有唔同嘅Sanrio卡通人物陪伴住成長，可以睇番晒由Sanrio創立至今推出過嘅公仔，好多個都好熟悉呀！

晴晴睇中咗呢隻小鹿，好可愛！但唔知幾時出㗎呢？一齊入去搵答案囉！~

Our SANRIO TIMES

Sanrio真係帶畀我哋好多回憶！展覧除咗可以欣賞由六十年代至今嘅展品外，仲可以即場學習繪畫唔同卡通人物，好睇又好玩！仲有勁多打咭影相位添！不如一齊穿越時光隧道，一同重拾童年回憶囉！

睇完展覽，又點會兩手空空行出嚟丫？晴晴又有收穫喇！Hello Kitty吸塵機？識用呢部之後，就要學埋用屋企果部幫下手做家務喎！XD

我哋去咗新濠影滙嘅「澳門食街遊」開餐，平靚正，如果有「新濠會」咭惠顧部分餐廳仲有9折添㗎！食飽正餐，當然要食埋甜品，將個肚填得飽一飽啦！

繼續為我哋下一個行程趕路喇，拜拜新濠影滙～截的士前往即將入住嘅酒店去lu~「鷺環海天度假酒店」位於路環區，由氹仔搭的士過嚟只需5~10分鐘車程咋！Check-in完之後，即刻可以上房，嚟到咁悠閒寫意嘅酒店，真係行步路都慢啲呀！

我哋揀嘅係「海灘景超豪華間」，房間大，簡潔舒適，而且出到露台仲可以欣賞迷人景色。咁樣先似係渡假嘛！*o*

澳門鷺環海天度假酒店

遠離繁囂鬧巿，嚟到鳥無人煙嘅路環區酒店，有種世外桃園嘅感覺。雖然無Playhouse、無大型水上設施，更無賭場，但就更感覺輕鬆自在，我哋都好滿意呢種悠閒寫意嘅渡假生活呀！

入住後嘅第一個活動就係大鬧酒店泳池，睇下晴朗玩得幾咁癲！

泳池及按摩浴池

海天一色嘅環境之下玩水特別心曠神怡、身心舒暢。玩完水個肚特別餓，搭Shuttle出去官也街搵食囉！

每次嚟到官也街有幾件事係必做嘅！到「晃記餅家」買芋頭酥就係其中之一喇！睇下條龍幾咁長？真係堅多捧場客呀！

「露素餐廳」係一間葡國菜小店，上次嚟幫襯已經係N年前，果陣都仲未識晴朗爸爸，特別想嚟緬懷一下~

餐廳設計同佈置上都冇咩變，可以帶埋晴朗一齊嚟重拾番從前嘅味道實在太好喇！

食物水準依然冇變，一樣煮得咁好味，所以我哋始終都係鍾情於小店，食物有無Heart，係食得出嘅！

豐富溫馨嘅一餐，晴朗都好欣賞呢度嘅食物呀！Yummy yummy~

朗朗極速食晒成碗墨汁飯，食到啲牙黑鼆鼆，笑死人咩？見到佢哋咁啱食，我哋都好滿足~^^ 晚餐特登唔叫太多，諗住要留肚去食甜品丫嘛！繼續響官也街覓食喇喂！~

今次被一間名為「土耳其冰淇淋」嘅雪糕店吸引咗埋去，事關老闆創新幽默嘅賣雪糕手法實在令在場圍觀嘅遊客都捧腹大笑。想從佢手上攞到杯雪糕唔易㗎！要眼明手快，而且有耐性先得！馬上派朗朗去體驗一下~

老闆真係好搞笑，我哋睇人哋買咗幾轉先決定買，佢每次都可以用唔同方法去捉弄遊客。啲人不但冇嬲，仲笑住咁拎杯雪糕走。開心指數大增呀！好欣賞老闆敬業樂業嘅精神！咁難先得到嘅雪糕，一定會特別珍惜，特別好味啦！XD

另一件必做嘅事就係到「莫義記」買榴槤雪糕食喇！榴槤雪糕、大菜糕、土耳其雪糕，個個都有糕食，大滿足！^o^

官也街後面嘅施督憲正街夜景好靚，亦係我哋行去 Shuttle Bus 站嘅必經路，一於邊欣賞邊散步，順便減下個大肚腩啦！XD 而番到酒店梳洗完睇一陣電視，可能玩得太攰，晴朗都好快入睡喇！咁就過咗旅程嘅第一天~^^

第二朝一早趁晴朗未起身，帶埋相機去酒店附近行下先~

行咗落沙灘，原來由沙灘望番過酒店係咁靚㗎！一個人聽住海浪聲，吹住海風，慢慢感受，好舒服！好放鬆！

番到酒店發現晴朗已經醒咗！仲睇梗風景添！哈哈！一家人都好鍾意呢度嘅景色，證明無訂錯酒店啦！^^

梳洗完後，又去咗玩lu~ 早餐都未食，真係服咗佢喇喇！

玩到餓，就嚟到富有歐陸色彩嘅酒店餐廳食豐富早餐，我哋個肚要啟動喇！^o^

Cafe Panorama

豐富嘅早餐，係一天嘅好開始！每次預訂酒店，我都會選擇包埋早餐，貪佢一落樓就有得食，唔駛餓住個肚四出搵食丫嘛！食過先知原來好嘅Buffet唔單只響巿中心搵到，路環區都唔錯，大家有機會一定要試試呀！

玩...食...玩，今次應該輪到玩喇！我哋去咗酒店嘅Kids Club，入住前向酒店查詢過知道係比細個啲嘅小友玩！所以都無抱有期望~

但無諗過晴朗四處進行大搜索，仲要玩到忘晒形，小朋友易滿足其實都係一個優點嚟呀！

每一個角落都係咁悠閒舒適，好有渡假感覺，去旅行就係想搵番呢種感覺啫！太美好！就讓我哋將幸福寫意嘅片段好好收藏起來，離開酒店後，又繼續向下一個行程進發喇！乘搭Shuttle到達氹仔新濠天地落車，步行至金沙城中心先去行街食嘢~

期間遇到我哋熟悉嘅Planet-J角色，當然要同佢哋合照啦！

經過禮品店，點都要入去行個圈！見到好多「魔石寶寶」，好興奮！但其實我哋屋企已經有三隻啦！ 呢一層都好多嘢啱小朋友行，衫褲鞋襪通通都有，有間超大型嘅店勁多玩具賣，仲大過香港嘅玩具反斗城呀！Shopping完後，又到醫肚時間喇！

第二次嚟到金沙城中心嘅Food Court食，貪佢平靚正之餘，種類仲好多，唔同國家嘅菜式都有齊。另外，好欣賞呢度嘅果汁，好味又足料。晴朗都大叫好味呀！行飽、食飽，就去Check-In囉～

澳門喜來登酒店 - 功夫熊貓親子房間

帶住晴朗都試過唔同嘅澳門酒店，但有親子特色嘅都係第一間。酒店在佈置上花咗唔少心思，而且房內所有設備都悉心為小朋友而設，係一間真正由小朋友做出發點嘅房間！晴朗都玩到癲晒！真係住多幾晚都願呀！

大鬧完房間一輪，玩到攰就瞓喺梳化度休息，真係識嘆！望住朗朗呢個模樣，開始有啲唔捨得佢喇！事關3日2夜澳門之旅，朗朗就去到呢度，由於第二日要番學嘅關係，將會跟隨晴朗爸爸先行返港。我哋玩嘅時候會掛住你哋架！XD

難捨難離，送走咗朗朗之後，我同晴晴就向巴黎人水世界出發，仲約埋好友會合！晴晴有好友相伴，無咗哥哥陪玩都冇問題啦！(唔好畀朗朗聽到呀...)

澳門巴黎人水世界

在巴黎鐵塔之下暢泳，是何等寫意嘅生活呢？小朋友可以任玩兒童水滑梯、翻斗樂，又可於水花四濺嘅飛船暢玩。大人可以登上12米高嘅滑水道，感受心跳加速嘅瀡梯體驗，玩到皺晒皮都唔捨得上水！

玩完水，好肚餓，孖住好朋友一齊番金沙城中心開餐囉！今餐唔食Food Court、葡國菜或者Buffet，係去打邊爐呀！好豐富㗎！跟住嚟啦！

鮮Xin亞洲火鍋

平時去澳門唔係食Buffet就係葡國菜，無諗過打邊爐都咁有驚喜！任食火鍋有齊海鮮、熱食、甜品、水果，而且仲有多款特別嘅秘製湯底揀，唔試過都唔知原來澳門嘅火鍋餐廳做得咁出色，值得推介！

食飽飽，帶埋好朋友一齊番房又玩到癲晒喇！我同好友都無佢哋咁好氣，一於佢哋有佢哋玩，我哋有我哋吹水、上網、睇電視，玩到夠先去沖白白囉！

換上酒店提供嘅浴袍好啱身，好可愛！今晚可以同媽媽孖鋪，晴晴勁開心！因為平時好少可以黐實媽媽瞓加嘛！瞓到發開口夢都識笑~ XD 旅程嘅第二天過去，點解時間過得咁快？去旅行個腦就只會想著食和玩，唔想旅程咁快完呀>.<

晴晴同好朋友一朝早就起咗身喇！皆因之前一晚已經預告過早起身就有大餐食囉！一提到食就特別醒神~ XD

晴晴嘅好朋友係功夫熊貓fans嚟！我哋又陪佢一齊癲下囉！XD

佢哋扮梗咩嘢？我諗要有睇過呢套戲嘅朋友至知喇！^^''' 不過小朋友一於少理，有得捐個頭入去扮下嘢就開心啦！XD

行到去餐廳心急開餐之際竟然發現大排長龍，個肚打晒鼓，點算好？唯有靜心等待啦！@@'''

盛宴 Feast

好多時見網上啲人比較澳門Buffet邊間好，盛宴都列於名單之上，久仰大名！終於有機會嚟試下，既期待又興奮！既然咁受歡迎，就真係要試清楚啲喇！

今餐食得特別快，唔錯！好合作！因為佢哋趕住去玩，我哋又過去巴黎人喇！

不過今次唔係嚟游水，係到Q立方王國放電呀！

小朋友們真係好心急，想影張相啫！就已經落後於佢哋。喂喂！唔好賴低我好喎！~o~

Q立方王國

每次計劃澳門行程嘅時候，都好鍾意安排時間到Playhouse玩。小朋友可以放電之餘，大人又可以鬆一鬆、抖一抖嘛！今次我哋就去咗開業未夠一年嘅Q立方王國，室內有太空船攀登架、長滑梯、波波池、互動投影機、電影欣賞、益智遊戲板玩，仲有戶外嘅城堡主題攀爬架同旋轉木馬添！小朋友玩兩個鐘都未夠喉，啲電多到無人有呀！

放電過後，我哋番房間收拾好行李，就準備Check-Out。睇見間房被小朋友弄得七凌八亂，就證明咗我哋喺到留底咗幾咁愉快同難忘嘅回憶啦！XD

受颱風影響，好幾個原先計劃咗嘅景點都無開，好彩的士叔叔提提我哋，如果唔係就要摸門釘！結果臨時改去澳門巿中心度行街食嘢~

首先去議事亭前地嘅「黃枝記」度食咗水蟹粥、雲吞麵、蜆介鯪魚球同豉油雞翼，本身只係隨意搵間店醫肚，無諗過佢哋啲嘢食都整得幾好味喎！晴晴好欣賞豉油雞翼，而好朋友最鍾意雲吞麵，一碗唔夠分，結果要再叫多碗呀！

嚟得議事亭前地，多數都會行埋上去大三巴。期間一定會經過玫瑰堂，每次路過都必定會入去參觀一下~

身為天主教徒嘅我哋，靜下心來禱告，要感謝天主賜與我哋好天氣同愉快嘅旅程呀！越上就越多人，如果以為平日就可以暢通無阻，咁你就錯喇！呢度真係一年365日都咁熱鬧、咁繁忙㗎！

大人掛住把握最後機會買手信，小朋友就忙住試食，好搞笑！街道兩旁嘅手信店都會不停有得免費試食，如果午餐食得唔飽，呢度都可以食到飽一飽~ XD

終於見到大三巴！係晴晴期待已久嘅一刻，大開眼界！事前功夫不可少，預先已經充當導遊，向小朋友簡單介紹過呢度好耐以前係一間聖堂，但被大火洗禮後，再經翻新，就變成為今日嘅大三巴牌坊喇！有故事嘅帶引之下，佢哋對於呢個景點都特別雀躍呀！*o*

一袋二袋嘅手信，過足Shopping癮！香港嘅親友有口福囉！餘下嘅行程係搭的士返酒店攞番啲行李，然後就搭Shuttle返碼頭喇！

離開酒店之前，遇到孫悟空同豬八戒，晴晴突然唐僧上身，又幾入戲喎！XD 傳聞中最宏偉嘅中國Show《西遊記》正在金沙城劇場上映，所以佢哋會到處同遊客影相。

去到碼頭見有啲時間，竟然畀我見到有「樂宮」曲奇賣，馬上買番兩罐先！鬆化好味過香港嘅熊仔曲奇㗎！

快樂不知時日過，又係時候講拜拜喇！如果你問我三日兩夜玩得夠唔夠，我可以話好過兩日一夜囉！但實情係仲未夠㗎！今次旅程係先悠閒，後精彩，大人比較傾向追求舒適寫意，而小朋友無時停，梗係鍾意玩過不停啦！兩間酒店各具特色，各擁愛戴！真係大人同細路都玩到樂而忘返呀！不過美中不足係有兩個景點都想去玩同介紹下，可惜颱風後需要一啲時間復原。期望下次再來澳門嘅時候，可以見到澳門已經康復晒啦！澳門加油！

備註：

1. 電話卡：因我哋有時需要致電酒店同餐廳，所以先買；如果大家無必要，其實去到酒店、Shuttle Bus或船上都有Wifi可以上網。

2. Our SANRIO TIMES展覽經已完結。

3. 鷺環海天度假酒店嘅Shuttle Bus無喺官也街設站，要在茵景園站落車後行大概10-15分鐘。

4. 搭船：諗住今次喺中港城上落船近屋企會方便啲，點知等登記入去同等上船都等咗好耐，時間無上環咁準時。