關西大阪一直係港人旅遊熱門之選，除咗去天王寺、梅田、難波、道頓堀同心齋橋等地方，仲有一個隱世親子好去處！
遠離繁囂 風景怡人
旅行有時就係想簡簡單單搵一個安靜嘅地方抖吓氣，忘卻心中嘅煩惱。小編今次就嚟介紹長居植物園呢個好去處！乘搭JR阪和線，地鐵禦堂筋線喺「長居」站落車，步利800米就到。如果住近心齋橋，過嚟都唔使一個鐘，唔需要舟車勞頓。
未入公園嘅呢條路景色已然非常優美。
照片攝於11月上旬，樹葉正在漸漸染紅。
湖邊風光 野餐熱點
步入公園不久就會見到綠茵茵嘅草地，以及一個美麗嘅湖泊。唔少家庭帶同小朋友或小寶寶前來野餐。呢度冇任何設施、高科技產品同影視娛樂。只有被自然風光包圍，大人同小朋友互動嘅笑聲，透出一份樸質嘅幸福感。
親近自然 餵魚為樂
湖中悠然游動嘅烏龜、肥魚同天鵝深深吸引小朋友嘅目光。連已成年嘅小編我都忍唔住駐足望咗一陣間。眼見唔少小朋友向湖中拋下食物（應該是麵包屑之類），吵吵鬧鬧自得其樂。
小孩放電 大人充電
小朋友有放唔完嘅電，公園內嘅廣闊草坪提供大量空間畀佢哋撤足狂奔，更設有吊床、拋豆袋等遊戲空間。
草坪喺臨湖嘅一面有間餐廳，望住寧靜嘅湖景，仲有天鵝相伴。家長們可以喺度好好舒一口氣！
另一邊嘅樹木以布織圖騰裝飾，氣氛恍如異國，值得一拍！
欣賞花卉 陶冶性情
叫得做植物園，當然會有時令花卉樹葉。11~12月當然係觀賞楓葉，聽聞4月左右亦會有櫻花。園內有唔同花卉嘅區域，以下呢個係玫瑰園，雖然暫時並未盛開，但唔同色彩嘅玫瑰依然賞心悅目。
花海形成指日可待。
入口處設有乾花工作坊，如有興趣可以留意！
