田媽一直有留意清新地這個生態農莊，但一直未有機會參觀，今次終於可以去玩，仲一去就玩盡佢，參加佢地新開辦的「半農半旅體驗」。
初時田媽見都個名都有點R頭，都擔心去到係做乜呢？加上田爸田媽都算係港孩1.0，田媽更加係中學畢業先第一次去宿營，露營的經驗更加係零，不過經過兩日一夜的體驗，田媽明白半農半旅的意思，更決定每年最少要同Justin去一次camping或glamping
清新地位於清水灣白水碗，可以由陸路或水路前往。我地就選擇左坐船去，感覺刺激D開心D
下午1:45到達白沙灣碼頭，準備出發。白沙灣碼頭好易去，基本上所有去西貢市中心的交通工具都會經過
2:00pm準時開船，好興趣呀！期待以久的camping開始喇！
坐15分鐘船就到，好快
一到達，工作人員就帶我地去自己個營放低行李。事前田媽都brief過Justin我地會住蒙古包，佢一見到已經興奮狂奔
一入去個蒙古包，我地一家三口都「嘩」一聲，真係好靚呀！有兩張大床加個小帳幕，夠晒我地三個住
Justin急不及待走左入個帳篷玩。留意下隻可愛bear bear熊，係清新地送俾我地的見面禮，可以帶埋佢返屋企
一共有6個蒙古包，田媽知道booking都好full
跟住係自由活動時間，本身清新地都係一個好受歡迎的農莊，有好多遊樂設施
Justin最愛的屋仔
又可以餵羊咩咩，尼隻係進擊的羊咩，成日大蝦細搶羊BB野食，所以我要影低你個衰樣
Justin話驚羊，咁就去玩佢至愛的車車，$25可以玩10分鐘
跟住又扮Mr Bull玩沙
田媽都嘆下先
玩左個幾鐘，就到今次旅程第一個重頭戲！話明不做港孩，即係唔可以飯來將口。今晚我地晚餐的所有蔬果，都要大人小朋友親自落田摘
工作人員叔叔先黎一個導賞，介紹一下一陣會摘乜菜
小朋友亦可以接觸同認識各類平時只有係街市，怎至媽媽工人姐姐煮熟左先見到的蔬菜。Justin聞緊香茅係乜味
這個農莊的所有蔬菜都係有機種植、不含農藥、非基因改造，可以放心食用
好大片的羽衣甘藍田，佢係super food，有防癌作用，亦係我地晚餐的其中一樣蔬菜
同田爸一齊剪香草
大過我個頭的椰菜花
拔蘿蔔首歌就成日唱，親手拔蘿蔔，連田爸都係第一次玩
做完農夫未休息得住呀，仲有今日第二個重頭戲：執柴枝生火。我地要係自己個營地附近執拾柴枝，今晚個火起唔起到就靠你地喇
勞動完一輪，休息一下先
跟住就要聽導師講解今晚個晚餐要點整同點生火。下午的時候Justin幫忙收割的菜，就係用黎整今晚的「雜菜香草春雞煲」
Justin同其他小朋友就係出面玩陣先
返到營地，田媽就忙於整雞煲，田爸就忙於生火
而Justin就忙於係個蒙古包內搞搞震
成件事最難就係要自己生火，田爸同其他爸爸都要不停向導師求救。原本30-45分鐘的雞煲，搞左個幾鐘先有得食，由於田媽太肚餓的關係，唔記得相機先食，差不多食完先醒起：係喎！未影相！田爸就話當賣個關子。
食後感：只落蔬菜、香草同少許鹽的雞煲原來都可以好好味。農莊附送的自家製麵條都好正。原本我同田爸怕會食唔飽，但係整晚都冇出現飢餓感
食飽飽，仲未訓得架，因為唔係飯來張口，聽朝個早餐要自己準備架！
導師先為我們準備好整麵包的材料，將麵粉、旦、糖、酵母、牛奶搓成麵團，放在膠盒內一整晚，等佢發酵
終於可以返蒙古包訓覺，明早8點焗麵包。入睡前聽住小溪的流水聲好特別。美中不足係天氣唔好，好多雲，睇唔到星星
第二朝本來7:30起身，點知Justin6:30就俾超級環迴雀仔聲叫醒左，仲好開心咁叫醒埋我同田爸，佢好期待今日繼續玩玩玩
梳洗完就出發去整麵包，尋晚個麵團已經發到頭咁大！繼續自食其力，自己麵包自己攞
然後就可以將麵團整成唔同既形狀
大家估下我地想整乜？
焗20分鐘就有得食，期間小朋友們又走去玩泥沙，中途已經聞到香噴噴的麵包味
出爐喇！我地見到田媽整果隻豬不禁爆笑，喂！第一次整係咁上下啦
早餐仲可以飲有機香草茶，有香茅同mint，好味好refreshed
食到咁上下，田媽就要去個營到收拾行李，10點鐘就坐船離開，完成2日1夜的半農半旅體驗
玩後感：
- 田媽田爸都覺得今次Glamping好難忘，可以讓城市中長大的孩子，體驗農夫的生活，亦明白唔係乜都唔駛做就有得食
- 本身Justin係唔鍾意食菜的小朋友，但係返到屋企食飯時，田媽就會同佢講下D瓜菜係點黎，佢都好似接受左食蔬菜
- 營地的洗手間同個蒙古包係有一段距離，晚上亦冇路燈，人有三急時有點去探險的感覺，不過Justin就表示極度過癮！其他團友們都向清新地反映，希望可以係campsite加建洗手間
- 雖然洗手間內有浴室，但十分簡陋，所以我地一家三口都冇沖涼，camping係咁上下啦
- 好似我地咁未去過真正露營的朋友，以glamping作第一次嘗試係唔錯的選擇
如果你都有興趣去住蒙古包，做下農夫，可以whatsapp清新地預約查詢
電話：51129195/ 55453062
清新地有機悠閒農莊
地址：清水灣白水碗 （科技大學旁）
Facebook: https://m.facebook.com/naturesharvest/
田媽玩樂誌專頁：
https://m.facebook.com/justinmamablog/
Instagram: justinmamablog
