全新Minions急凍鐳射滑冰車登陸日本環球影城！必買BB衫+草裙爆谷桶！

Bello！日本大阪環球影城推出全新迷你兵團Minions「急凍鐳射滑冰車」設施，以及夏日活動「迷你兵團雪花派對」，同大家一齊玩水槍濕身消暑！園內有多款以夏日風情做主題嘅新產品，風扇、毛巾、口水肩乜都有！仲有去環球影城必買嘅爆谷桶仲新出咗草裙舞迷你兵版本，超級可愛！

夏日活動「迷你兵團雪花派對」，咪以為佢只係會噴吓水花，原來真係會濕身架！

開場交代完劇情之後，百厭嘅迷你兵同一班工作人員就會攞住水槍射向台下觀眾區！

小朋友當然一早買定水槍還擊！但犀利都不甘示弱開動大型水炮，包你由頭濕到腳趾尾！

新開嘅迷你兵團「急凍鐳射滑冰車」係坐喺車上玩嘅轉圈圈機動遊戲，有少少似露天版咖啡杯～
小朋友身高達到92cm就可以喺大人陪同下玩，身高達122cm架話仲可以自己玩，唔使一定要家長陪！

一路玩嘅時候，周圍嘅迷你兵會噴水，幫大家消暑降溫！

如果唔想排咁耐隊，仲可以預先攞預約券，慳返好多時間！

玩完滑冰車，可以喺隔離玩埋迷你兵團調皮百厭乘車遊！

迷你兵一有時間就會出嚟同大家打招呼，最岩一家大細影相打卡！

環球影城嘅爆谷桶出名精美，今個夏天仲新出咗草裙舞迷你兵，配埋香蕉味爆谷，真係忍唔住要唱返首Banana Song！Ba-Ba-Ba Ba-Ba-nana～

園區內有多款迷你兵團主題美食，包括蛋包飯、漢堡、泡芙同夏日透心涼沙冰！～

唔少家長都覺得，要氹小朋友飲水簡直難過登天，但如果有呢個迷你兵造型飲品杯就唔使擔心喇！

夏日熱辣辣，真心好需要風扇或者冰感毛巾幫手消暑！

BB口水肩、連身衣、童裝T-Shirt全部都好靚！小朋友着上身一定好可愛！

仲有唔少親子裝，可以全家一齊扮Minions！

溫馨提示～
夏天日本環球影城特別多人，部分遊樂設施分分鐘要排隊一小時或以上，所以如果想玩得盡興，建議出發前買定快速通行券，可以慳返好多排隊時間！

購票詳情可參考以下連結：
日本環球影城™ 1日電子門票
日本環球影城特快™入場券 4

部分照片提供：日本環球影城

特別鳴謝：KLOOK