小朋友都玩得嘅可愛Halloween 糖果從天降！恐怖又得意Minions萬聖節活動登陸日本環球影城！

日本環球影城每年萬聖節都會推出主題活動，今年嘅「環球驚喜萬聖節」將於2018年9月7日至11月4日登場，仲新加入可以同小朋友由朝玩到晚嘅「恐怖可愛Halloween」活動！

萬聖節活動一向好少同小朋友扯上關係，事關以鬼怪做主題嘅角色同活動通常都好恐怖、好易嚇親小朋友，不過如果由Minions、Hello Kitty、史努比、芝麻街扮演萬聖節鬼怪，成件事即刻變到好可愛，小朋友一定好鍾意！

迷你兵團變身成有少少恐怖但又好可愛嘅怪獸，日間「慶祝大巡遊」嘅「HAPPY Trick or Treat」，糖果會好似噴泉咁由天跌落嚟！

夜晚仲會有首次舉辦嘅「環球奇境恐怖可愛之夜」，Wonderland園區內會加入夜間萬聖節燈飾，周圍嘅牆壁上將會浮現以萬聖節為主題嘅Hello Kitty、史努比同埋芝麻街場景，令一家大細由朝到晚都可以感受萬聖節嘅活潑熱鬧！

今年日本環球影城仲新增「成人Halloween」同埋「尖叫 Halloween」兩大主題區域，參加者要角色扮演成為故事一員,甚至有唔可以發出聲音嘅靜音迷宮，仲有大量殭屍同埋以電影《兒凶4：鎖命怨靈》做主題嘅恐怖世界，鍾意刺激嘅你萬勿錯過！

照片提供：日本環球影城