放電好去處：維多利亞公園

維園呢個公園嘅名真係可以話成日都聽，嚟玩又真係好似未試過，早前係突如其來之下，三口子嚟行一轉，原來維多利亞公園都係一個唔錯嘅放電好地方嚟呀！

我地約咗小豬媽食晚餐，見未夠鐘，當然要搵啲地方俾小小豬放一放電。望見維園所以我地就決定入去行一轉啦！

坦白講，我對上一次係維園行嘅時候(唔計工展會嗰啲大型活動)，都應該係回想返我中學時代同一班同學參加完城市論壇之後，都真係有N年冇係入面行過啦！

我地三口子踏入維園時，就被呢個大草地吸引住，見個太陽都唔算猛烈，所以就向大草地進發，等小小豬跳跳跑跑啦！

哈哈...好在我去街背包時刻都帶住啲小汽球以備不時之需，一個咁大嘅草地最啱就係玩汽球啦！睇佢地兩父子喺草地上玩得幾開心！

係個大草地入面都跑左大半個鐘，之後我地就轉戰另一個放電好地方，當然就係公園內小朋友最鐘意嘅設施。小小豬當然唔例外，係入面不停玩啦！

公園內仲有一個跳飛機，又嚟跳跳跳啦！

仲有一個小石池，其實我地都唔知個小石池有什麼作用，不過大肥豬見當時池內沒有其他小朋友，所以就同小小豬玩一陣拋石頭啦！

除左小小豬玩嗰個地方之外，係附近仲有一個大型啲嘅兒童設施，不過因為到左我地約小豬媽嘅時間，所以冇去玩，下次有機會一定要玩埋嗰個呀！

真係估唔到簡簡單單嘅維園，都可以俾我地消磨左兩個幾鐘。其實維園真係一個唔錯嘅地方，有兒童玩樂設施，又有一個小食部，玩到攰可以食少少嘢休息一陣再玩過，仲我最鐘意就係佢個大草地，所以下次機會可以再帶小小豬嚟放電呀！