呢排轉天氣小JM媽嘅氣管真係唔多掂，睇來除咗煲糖水之外仲要煲下湯水先得啦！
其實一入秋我嘅氣管就好易中招，為咗快啲好返就當然要煲下湯水調理一下。
今次我就決定煲猴頭菇、響螺頭同海底椰！你又知唔知我想煲咩？咁功效你又知無？
猴頭菇：有健胃、補虛、益腎嘅功效
響螺頭：具有滋陰補腎及養肝明目功效
海底椰：有助清燥熱、止咳、滋陰補腎而且仲潤肺養顏
聽完係咪都覺得好正，想即刻煲來飲下呢？事不宜遲，即時睇下要啲咩材料同點煲啦！
材料：
瘦肉 一份
螺頭 三個
猴頭菇 三個
海底椰 四個
紅蘿蔔 一條
南北杏 適量
蜜棗 一粒
做法：
1.) 先將瘦肉洗淨，再汆水備用。汆水可以令油分減少，咁啲湯煲出來就會清一啲。
2.) 將螺頭用水稍為浸一浸，再用細牙刷刷去表面嘅污穢，再除去螺頭的殼，並將螺頭開邊切半備用。
3.) 猴頭菇需要先稍作沖洗，再剪成小塊，備用。
4.) 海底椰洗淨後用刀將其開邊切半，備用。亦可按需要要切小片。
5.) 紅蘿蔔、蜜棗及南北杏先用水洗淨，紅蘿蔔則切成小件，備用。
6.) 煲滾水後將瘦肉、螺頭、猴頭菇、海底椰、紅蘿蔔及南北杏放入。以慢火煲約45分鐘。亦可按喜好加入蜜棗以作調味。
