話說包爸包媽有自己愛巢之後，都有做下垃圾分類、用下環保飲管，婚禮時參加剩食回收，算不上環保分子但都想出一分力。陀住包包時都諗，點樣可以製造少啲垃圾呢？
除咗喺屋企時用乾棉整濕換片代替濕紙巾（濕紙巾唔係紙嚟架真係...），其實個名叫「紙」實質係「膠」尿片先係最誇張！
初生B一日換8-12條片片，包包依家8個月大，一日大約都要換6-7次，一年差不多要用3000條紙尿片！全部都係膠，大家諗下到底要幾多年先分解得晒……
大肚時行BB展，發現香港原來有環保尿布！媽咪成日話我細個都係用尿布，但係，咦，設計咁靚嘅~原來宜家嘅尿布已經新潮兼方便好多，當時同包爸停低睇咗一陣聽講解，不過時間尚早唔敢出手買住就離開會場啦。雖然當時無入手，但呢樣產品一直喺包媽心底。
更多分享請到 FB Page雲妮手札
到包包出咗世，初生時期真係焦頭爛額到一個極致，淨係換片餵奶已經用盡氣力，到接近2個月先慢慢上手。8月行BB展又再遇見環保尿布，喺包爸唔多睇好下，包媽輕輕入手2套試用裝，睇下用落O唔OK先，要放棄都唔好製造咁多垃圾呀嗎 ～
呢張係包包第一日著環保尿布時影
好多媽媽想試用尿布，阻力都來自家人，不外乎話 「唔方便」同埋「屎尿好難洗乾淨」，暫時包媽用咗尿布5個月，輕輕分享一下用家感受
方便度：當然紙片著完掉左佢當然方便啦，但尿布又係咪真係咁麻煩呢？以最先入手嘅牌子Green Beginnings為例，魔術貼設計同紙尿片基本上無分別
魔術貼設計同紙尿片有9成相似，新手使用時好易上手
最開心係感染埋老公，以及主力湊包包嘅爺爺嫲嫲都肯使用﹗清洗工作基本上我放工會處理，湊BB時佢地只需要清潔，著同除，對於佢地工作量無增加，自然容易接受！
家人換片後直接放入防水袋，拉埋拉鍊隔晒味，夜晚包媽放工一次過清洗
更多分享請到 FB Page雲妮手札
清洗方法：(有便便圖慎入)
- 有便便花灑沖走先，無便便嘅就唔使理
- 全部先放入機用最短洗程pre wash過水，目的係過水一次洗走尿味屎味，包媽嘅洗衣機最少係14分鐘
- 再同其他衫一齊用40度水棉質MODE開機，大人或bb衫都可以
- 便便跡通常花灑沖完再洗衣機洗已清走大部分，仲有黃曬太陽就可以消除，真係有頑固便便跡，可以加少少檸檬汁再曬太陽，乾咗正常洗多次再著就ok
上面係未清洗，下面係花灑沖走便便影，其實只係得返少黃印
如果真係好介意便便放喺防水袋成日，可以用呢種即棄隔便墊，可分解物質總比膠嘅尿片環保
但記得有4大千其唔好做嘅事：
- 唔好浸（會滋生細菌）
- 唔好用梳打粉（會塞纖維令片芯唔吸水）
- 唔好用手洗（唔會乾淨過機洗&洗劑殘留紅pat pat）
- 唔好用bb洗衣液(潔淨力不足)或任何含柔順劑嘅洗衣液/球（會塞片芯纖維致吸尿量減低漏尿）
另一樣成日被Challenge嘅 --- 「慳得幾多啫﹗」我地一齊計計數啦：
初生換片一日8-10塊，慢慢長大都大約要一日換4-6次
初生尿片約 $1@，L碼片一般 約$2@
我地取個約數，一日換6次片，每塊$2
30日6次$2=$360
10個月都$3600
如果係大隻B，加大碼片就更貴，要$3一條
30日6次$3=$540
10個月就$5400
未計更貴嘅拉拉褲……正常返幼稚園2歲前後戒片，計一計其實講緊全紙尿片都要用過萬蚊！！
包包宜家會自己揀尿布著哈哈哈
而尿布呢？包媽暫時有13條尿布，用咗千幾蚊左右，基本上已經可以用到戒片～～所以有朋友就算喺BB一歲先開始轉用環保尿布都唔會蝕
尿布仲有好多花款，呢條牛仔褲款夏天就咁著都唔失禮﹗
只要係日日用, 呀B愈大隻就愈抵用，當然就愈早就會慳得愈多
轉咗尿布之後包包無再紅PAT PAT，每次換片摸下，屁屁都係乾爽滑一滑！對愛錫BB嘅父母嚟講，應該都係一大誘因，不妨入手兩條試一試啦^^有時間再同大家分享下更多尿布經啦～
其他QE系列BLOG：
【包媽孕記】伊利沙白醫院QE L block登記方法及第一次產檢流程分享
如果有任何問題，歡迎隨時到FB Page雲妮手札留言 =)
