講到幫小朋友戒片，相信無論個過程係順利又或者嚴峻，都係每個家長嘅必經階段，以前阿媽果代就話可以由佢唔著片，到佢賴咗wee-wee就自然識尷尬，乖乖地去廁所，但係呢個世代，好多時都講求小朋友嘅心理素質，顧全佢哋嘅自尊心，似乎比戒片重要得多！
咁到底又係咪可以由佢唔戒，一直著片返學呢？最近就有JM擔心自己小朋友3歲都未戒片成功，隨時要著住條片開學！而網友們對於呢個重大任務都各有經驗同心得，除咗可以同小朋友分享一啲關於去廁所嘅故事之外，仲可以以糖果或者貼紙鼓勵小朋友使用廁所，而另一方面，原來時機都係好重要！
「可以試下比貼紙，有冇同佢講下去廁所嘅故事？」
「我仔喺返咗學先戒片，其實好睇學校肯唔肯幫手！」
「 雖然我女算遲，但我真係發現小朋友自有佢哋自己的進度！」
「其實我覺得佢心理準備好，明白呢件事，就自然戒到！」
討論區熱話：3歲未戒到片
對於戒片呢個問題，鯊魚太一直都抱住順其自然嘅態度，鯊寶成功喺廁所解決到就固之然開心，不過唔成功的話，又無話太失望或者過份焦急，反正最後又唔會著到2046！某程度開學前同戒片成功係無關係，皆因有唔少小朋友喺屋企點戒都唔成功，但一返學望見個個同學都識舉手去wee-wee，就自然會秒速成長！
至於小朋友應該幾時先需要戒片？其實控制大小便係小朋友一個自然生理發展階段，唔係話愈早開始訓練就愈好；一般嚟講，歲半至兩歲小朋友就會表達出一啲狀況，話你知係時候開始訓練佢戒片喇！好似話片片喺兩小時或以上都能夠保持乾爽，又或者瞓晏覺嘅時候無wee-wee；另外，poo-poo變得有規律都係一個好時機！
討論區熱話：3歲未戒到片
講到應該點樣訓練小朋友去廁所，首先家長們都要保持耐性，畀時間小朋友去培養去廁所嘅興趣，同時準備一個固定，而且小朋友又鍾意嘅小廁所，等佢習慣坐喺便盤上嘅感覺。
另一方面，網友們提到同小朋友講啲關於去廁所嘅故事，都係個好辦法，最重要都係給予小朋友適量嘅鼓勵，如果情況許可，亦不妨比小朋友跟埋屋企人一齊去廁所，其實都係一種身教，等佢有機會模仿一下。
最後，其實每個小朋友需要嘅訓練時間都唔同，千祈唔好因為有比較，而變得心急，將去廁所都變成一件充滿壓力嘅事！
