好多父母都望子成龍，希望自己小朋友可以贏在起跑線上，從小就為小朋友安排各式各樣嘅補習班、興趣班。「我都係為咗你好。」已經成為各位父母愛的口頭禪，但其實小學生嘅壓力係比我哋想像中大！
進入小學後，以往喺幼稚園玩樂嘅學習模式已消失，除咗日常上課嘅功課要做之外，仲有測驗、考試、排山倒海嘅補習班、大大小小嘅興趣班，每晚搞到12點訓並唔喺咩新鮮事，分分鐘忙過各位大人。加上依家小學習作嘅難度真係今非昔比，有網民近日就分享咗一條小一嘅功課問題，就係叫小朋友睇名畫答構圖方法，真係唔好話小朋友會有壓力，相信父母們見到咁嘅題目都大有壓力......
討論區熱話：畢加索在“哭泣的女人“中用了哪一種構圖方法?
面對呢類咁「難」答嘅題目，網民就有唔同意見：
「小一就問咁複習嘅問題？邊一間學校啊？」
「依家YouTube 乜都有教學，細路學嘢咁快，攪得掂嘅！」
「我才不會為這種題目傷神和花時間呢，隨便應付就算了！ 」
更多文章：成績再好亦不及品德重要
日復日，小朋友長期唔夠時間休息，最後精神耗盡，導致無專注力而學習能力下降，最後自然沒有贏家。究竟點樣可以令小朋友有一個快樂嘅童年之餘，又可以同時為未來打好基礎？
想要有放鬆嘅仔女 就要有識得放鬆嘅父母
橡筋拉到最盡都會斷，人都喺一樣，無可能365 日都拉到盡。總需要時間去放鬆，俾仔女有時間休息、補充體力。 嘗試去觀察仔女可以維持專心幾耐，一個鐘？兩個鐘？ 到佢哋開始唔可以專心嘅時候，就提提佢哋飲杯水，拉下筋，玩一個自己鐘意嘅遊戲，好好咁休息十分鐘，然後繼續努力。好比一直無間斷咁坐喺隔離監視住，郁啲就咆哮山莊咁，自己都攰啦......
人比人 比死人 避免比較
「隔離陳師奶個仔都喺咁啦！」NO！為仔女訂下一套度身訂造嘅學習模式好重要！最清楚自己子女，莫過於自己。 簡單啲講，回想仔女仲係BB個陣，當你聽到鄰居嘅小朋友已經識拎湯匙食飯，而自己小朋友仲未識，就唔知點解會急急腳捉著佢隻手練習。試想像隔離個小朋友已經一歲，自己個BB先得五個月，又點可以勉強佢做到呢？家長們應該因材施教，逐步嘗試。喺小朋友面前直接比較，亦會令小朋友感到壓力，應儘量避免。
製造美好回憶 減輕小朋友壓力
當小朋友學習期間，處處都感受到壓力，久而久之就唔可以將快樂與學習連繫，最後造成不良嘅印象或失去興趣。 將學習演變成獎賞目標，可以鼓勵小朋友多啲動力去完成功課同温習。 可以從細小獎勵開始，例如專心做哂功課同温習，就可以有朱古力食。 又或者連續一星期盡力去完成功課同温習，就帶小朋友去大自然露營，或做佢哋最想做嘅嘢。 期間亦可以不忘稱讚佢哋嘅努力，再次讚賞佢哋之餘，更可以令佢哋將自己努力與快樂掛鉤，造成一個好印象。
教育小朋友，係一場長期挑戰，當中固然有好多跌跌撞撞，唔緊要！同小朋友一齊成長一齊學，用愛同快樂去建立呢段關係啦！
