Pig Pig年快樂!!向來對數字絕緣嘅我，真係數埋腳趾都差啲計唔到自己係第幾年同定咩過新年...
思前想後，經過多番核證後，今年已經係第三年喇！（雖然仲有一絲疑惑，明明係得2歲多啲，點解係第三年...）原來單單睇佢新年表現就知道佢真係大個咗好多；由第一年仲係BB，一舊飯咁任人（我）魚肉；到上年，著起件大到3歲都仲可以著嘅賀年外套，行起上嚟仲一仆一碌；到今年，已經識講新年快樂、身體健康，郁下手仔講恭喜恭喜...
作為阿媽，真係有總「月球一小步，地球一大步」嘅感覺，同時又會諗，可唔可以大得咁快？我仲係好掛住嗰個啱啱識自己揸住奶樽嘅定咩、啱啱識拍下手掌嘅定咩、啱啱...再諗下將來佢會成家立室，有自己嘅家庭...終有一日佢都會離開自己身邊，到時放工返到屋企，開門嗰陣就再聽唔到個仔好興奮咁大叫：媽咪！你返嚟喇！
講到呢度，個心都不禁戚戚焉，仲有啲眼濕濕，雖則其實可能係廿幾三十年後嘅事，但我都開始明，有時阿媽會話諗起你手抱嗰陣，仲好似係尋日嘅事，咁講唔係因為搭咗時光機，而係我哋幾時都咁珍惜小朋友成長嘅每一秒時光。依家成日話學做父母要考牌，以我短短嘅幾年貨仔經驗覺得，如果真係要學，首先就係要學放手，唔簡單，但必須做。
放手畀佢試、放手畀佢跌、放手畀佢飛，幾肉痛、幾唔捨得都係必須要做，不竟佢有佢嘅人生，子女從來唔係要嚟實現你做唔到嘅夢想功具；成長道路上，有時父母或者只係需要靜靜企喺佢身後，擔當最強嘅後盾，話佢知即使風大雨大，都有屋企呢個避風港，加油後再出發，咁就夠喇！
原來有啲感覺，真係做咗人父母先會明...
