BB 仲細嗰陣，唔少家長為咗夜晚方便照顧，而會選擇與BB 同共枕。BB每晚瞓喺自己隔離，每朝啱啱醒個樣對住自己，真係無比可愛。不過，為咗佢哋著想，家長們喺囝囡3至5歲個陣係時候要割愛，訓練佢哋自己一個人瞓一張床，如果唔係久而久之成為習慣後仲難放手！
小朋友分床瞓係一種成長期必經嘅階段，當中涉及建構將來人格嘅重要發展，例如學習私隱嘅概念、培養獨立意識、學習不事事依賴。各位家長要記得，分床瞓呢個大計劃一定要循序漸進，唔好拎「咁大個都要人陪」呢種說話去強迫小孩，否則得不到成果，甚至拖延進度，家長必須以合適方法去慢慢幫助小朋友。
討論區熱話：小朋友怕黑，要人陪住瞓，應唔應該陪？
分床瞓有咩好處？
1. 減少事事依賴父母，學會積極獨立解決問題嘅態度。
2. 學會喺父母以外獲得安全感，訓練其膽量及勇氣。
3. 始終成年人要處理嘅事務較多，入睡時間相對夜。分房瞓可以令小朋友作息定時，養成每日定時睡覺的習慣。
4. 較為願意學習生活上其他好習慣，建立全人發展好開始。
同床瞓有咩壞處？
1. 大大增加孩子被壓或缺氧嘅危機。
2. 父母會因過份遷小朋友而影響睡眠質素。
3. 延遲培養小孩成長需要嘅獨立能力。
4. 夜晚想同另一半親暱少少都唔得，影響夫妻間感情。
究竟小朋友應該幾歲開始要分床瞓？
正式分床瞓，其實無一個確切嘅時間標準俾所有小朋友。每個孩子具體成長嘅狀況、性格都唔一樣。每位家長都要審視自己小朋友同自身嘅生理、心理狀態，例如小朋友自理能力較強、夜晚瞓得比較安穩嘅時候就可以開始嘗試。
根據香港家庭計劃指導會資料庫提到：「孩子在三至五歲的幼兒階段，已開始注意男女之別。這時期他們需要學習私隱的概念，亦要明白及尊重父母的私人空間，正是培養獨立意識的好時機。」成功分床瞓與否，真係要依照自己小朋友能力同個性，再而配合正確方法慢慢實行。
討論區熱話：小朋友怕黑，要人陪住瞓，應唔應該陪？
如何訓練小朋友自己瞓？
1. 只分床不分房
小朋友1歲之後會發展出分離焦慮嘅情緒，如果呢個時期就急於分房瞓，BB會好容易扭計哭鬧，對於人格建立或會出現負面影響。首先可以將一邊BB 床嘅圍欄拆低，然後貼近父母床邊放置，咁樣擁有各自空間之餘亦依然親密。呢段期間觀察小孩嘅狀態，適時將圍欄再裝上，再下一步就將BB 床同大床之間距離移開，俾小朋友慢慢適應分床瞓呢個習慣。
2. 利用小朋友喜歡嘅角色做榜樣
臨瞓前嘅講故事時間，不妨同小朋友講佢哋鐘意嘅卡通人物（如Elsa/Spiderman）都喺自己房瞓覺，俾佢想像自己鐘意嘅人物都做到，自己亦都可以做到，係一個大個仔/大個女嘅標誌。
3. 與小朋友一同佈置房間
佈置小朋友房間嘅時候，可以邀請佢哋一齊準備。裡面大大細細嘅擺設、佈置、顏色都跟據小朋友嘅意見去放，不但可令小朋友期待屬於自己嘅空間，亦吸引到佢哋想係自己設計嘅房瞓覺。
4. 家長轉移陣地
好多小朋友會誤會同父母分房分床瞓之後，父母就會唔理佢。當小朋友多咗開始去自己房活動，父母就可以將睡前活動轉移到孩子房，一齊講故事書、分享今日所見所聞，從而減輕佢地呢種焦慮。
5. 稱讚小朋友獨自瞓覺勇敢
小朋友成功獨自一人入睡後，第二日記得加許佢哋嘅嘗試同勇感，令佢哋認同自己嘅努力。嘗試並唔會一步到位，如果中間有失敗嘅時候，都要不忘溝通，了解其心情同擔憂，從而再改變方向。
