作為父母當然希望仔女可以出類拔萃，而喺香港呢個彈丸之地，只要競爭力稍為差少少都好似會被淘汰咁，家長好多時為咗仔女嘅未來，都好緊張佢哋各方面嘅成續，偏偏就忽視咗眼前同最重要嘅品德！而且過份催谷，反而仲會變成壓力，影響親子關係，咁到頭來成績再好又有咩用呢？
對於呢個「品德 VS 成績」嘅問題，有JM就特別拎出嚟同各位家長討論一番，而答案其實都幾一面倒，「成績再好都唔及人品重要」，就同希望仔女發達定健健康康一樣，一個咁簡單嘅問題放喺面前就梗係答得輕鬆啦，但事實上大家嘅身體又誠唔誠實呢？
「 邊有人會揀寧願仔女人品差！」
「人品好，唔使揀！無品德讀幾多書都無用！」
「 小朋友人品好唔好，好睇由細到到大父母點教，父母有教養，小朋友都比較有家教！」
討論區熱話：人品vs成績
討論區熱話：人品vs成績
雖然就話成績同人品唔係二揀一嘅選擇，有JM亦話唔使去到咁極端，成績好都可以品德好，之但係若然真係要你揀嘅時候，你點都會將品德行先，既然係咁，喺家長們好用力鞭策仔女學業嘅時候，又有無忽略佢嘅德育發展呢？其實品德培養都需要好好引導同發展，唔係成績好，品德自然好，如果比過度重視成績，又會唔會令仔女為咗爭取父母認同而出貓、偷試卷等等，做出一啲有損品德嘅行為？
講到點樣先可以提升仔女嘅德育發展？其實除咗身教之外，適時為佢哋作出輔導、引導都好重要，而喺追求知識嘅過程，其實同時亦都可以教導仔女盡力而為嘅過程，比起最後成績更為重要，學識當中應該感恩嘅事，絕對係人生中嘅重要一課，所以鯊魚太覺得「品德 VS 成績」呢個問題絕對唔無聊，反而正正提醒家長們育兒嘅初心。
