新冠肺炎肆虐多時，影響了我們的生活，小朋友們無法回校上課，在家網上學習，與父母「困獸鬥」，家長們有苦自己知。有港媽分享指，孩子上網課愈來愈心散，不願意專注學習，令她十分激心，希望政府盡快宣布全體復課。
更多文章：【JM有話兒】尋找子女胎前記憶？關心妍囡囡：JESUS畀我揀媽咪
該名港媽在《親子王國》以「鬧女鬧到自己都喊，無助」為題發文，指出經過多個月的網上學習，女兒愈來愈心散，近日從奶奶口中得知，女兒上網課期間不專心，發白日夢，更避開鏡頭，令要兼顧工作和家庭的她壓力爆煲，罵女兒時自己也忍不住大哭，「放工返來已經即跟功課，溫月尾考試內容，聽到佢嘅行為，嬲到我癲，鬧佢自己都忍唔住爆喊，話咗好多次都係咁」。
最令港媽無助的是，即使向丈夫投訴，對方亦不出聲，「佢話我話緊個女，佢廢事出聲，而佢平時都係唔會幫手，嘥氣」。港媽批評政府不明白家長和小朋友的無奈，希望盡快恢復實體課「小朋友同家長有幾慘佢哋知唔知？」
帖文引起討論，大部分家長都認為事主太緊張成績，以致影響自己兼損害親子關係，勸她放輕鬆，「小朋友唔專心好小事，放鬆啲，佢都冇乜做錯嘢」、「別太著眼過錯，多欣賞她的優點，培養自信心。上zoom真的好辛苦，大家都受罪。」、「真係唔使太緊張，小朋友大個啲就慢慢識諗㗎啦」、「冷靜啲，好多小朋友（包括我仔）上緊zoom都睇YouTube、打機，上得Zoom多係悶啲，慢慢教」、「退一步想，讀書只佔人生一部份，但不是全部，先等自己放鬆，使關係緩和些，先再繼續」。
更多文章：【JM有話兒】男醫護助12歲女照X光 港媽被趕感不滿
亦有人認為，網上學習的確難以專注，家長應該易地而處，諒解小朋友的難處，「我自己試過zoom，真係好難幾個鐘集中精神，其實小朋友有時唔集中真係好平常，你反應太激動了」、「自己都做過小朋友，真係唔好迫得太緊。」、Zoom得長時間係會遊下魂。我自己Zoom meeting都會咁」。
