現今世代做人父母有個世紀大矛盾：想俾子女過得舒適安逸抑或是培養佢哋堅強忍耐嘅性格。 一方面唔希望子女做溫室小花而唔識得珍惜事物；另一方面，雖然想子女明白所有事得來不易，但唔捨得向子女實行軍訓教育，擔心太過嚴苛會抺殺咗佢哋童年。究竟放手與捉緊中間，家長們如何取得平衡？
討論區熱話：永恒的矛盾
更多文章：不惜一切培養小朋友成材 前路掌握喺父母手上定應該放手由子女尋找？
討論區就有家長有呢個教育疑惑，認為子女依家生活過得比自己細個好，熱少少、攰少少都捱唔到。想佢哋明白世界艱難，擔心佢哋年輕時唔捱得嘅話，將來投身社會會適應唔到；但又覺得自己細個辛苦過，依家輪到自己做人父母，都想俾最好嘅生活小朋友，覺得無比矛盾。
其實講到尾，最重要係放手同捉緊之間搵到平衡，教育路上唔可以側重其中一方。首先父母教養子女，應該給予子女自由發展空間，俾佢哋有機會自己探索呢個世界，喺跌跌撞撞嘅成長路上學習，可以稱為「放」；喺小朋友未成年前，佢哋未有一套完整明辨是非嘅能力，會喺成長階段中以家人、朋友、學校、社會慢慢建立自己一套思想同價值觀，作為父母可以分享自己嘅個人經歷作為參考，亦應從小灌輸適當的價值觀，俾佢哋去理解同感受。將來自然會尋找到屬於自己嘅人生意義，而唔係一味盲目跟隨父母意願嘅路。
討論區熱話：永恒的矛盾
更多文章：不惜一切培養小朋友成材 前路掌握喺父母手上定應該放手由子女尋找？
如果只著重捉緊小朋友，佢哋難以有獨立思考同反省能力，唔識得自己處理問題；給予太多自由甚至唔理會小朋友所作所為，佢哋會容易變得目中無人，唔識得為人著想，事事以自己行先，甚至好容易誤入歧途。
又或者簡單啲舉例，如果講及子女嘅興趣及夢想，家長大可以放手俾小朋友自己摸索，俾佢哋喺自己舞台發展所長；但講到價值觀同是非黑白，父母有責任教導小朋友正確嘅處事方法。雖然係世紀大矛盾，但亦願天下父母都可以取得平衡，與孩子更全面更健康地成長。
