【蕭栽見聞】巴士上，一個年約三歲的小朋友做著一些媽媽不喜歡的事情，媽媽語氣認真地說：「我數三聲好停喇！一……二……三！」小朋友依然固我，繼續原來的事，這時媽媽又用同一語調說：「一……二……三！」小朋友還是聽不到媽媽的「最後通諜」，於是媽媽再數「一……二……三！」最終……
Sorry! 呃咗你入嚟，其實我唔知最終結果係點，因為正所謂「三三不盡」，依三聲可能係直到永遠，而喺永遠面前甚是渺小嘅我，已經係某個平凡街口轉角嘅巴士站落咗車。
不過…… 我有個疑問，既然要數咁多次三聲，點解唔一開始就講「我數三百聲好停」呢？
「一……二……三……四……五……六……七……八……九……十……十一……十二……十三……十四……十五……十六……十七……十八 ………………………………… 三百！」
其實，計我話，教小朋友最緊要講得出做得到，講咗又做唔到，咪即係畀小朋友知自己講嘅野係廢話唔使聽？無面就事小，小朋友唔再相信自己講嘅說話就事大。
又再其實，小朋友有時真係唔明大人做咩無啦啦叫佢停架喎，仲要得三聲嘅緩衝時間咁短，你咁樣同老師對學生講” Time’s up! Pens down”有咩分別呀？你知唔知個學生仲有好多野想寫落份卷度架？你而家話停就停，真係好殘忍、好無人性呀！嗚嗚…… (蕭栽回憶往事一時感觸……)
講返正題先，與其咁孤寒畀得三聲時間小朋友，不如下次試下畀三次佢，叫佢做多三次一定要停止 (最好解釋多幾句啦！)。佢都係唔停要點？依啲你諗你喇！畢竟個小朋友又唔係我嘅~ (不負責任mode)
(以上純粹蕭栽個人見聞及感想，如有冒犯，請你食飯。)
*********************************************************************
各位媽咪喺對小朋友講「數三聲好停」之前，其實有無諗過小朋友唔停的話要點做呢？大家分享下丫！
