自從爆發新型冠狀病毒「COVID-19」以嚟，香港人好多生活習慣都變得唔同咗，由以前每日人貼人迫住搭車返工放工，到而家有啲人Home office，有啲人就搭住架好鬆動嘅車返公司；由以前放工放假成日約親朋好友打邊爐，到而家連落樓下食個飯都唔敢，因為唔想嘥咗個口罩，因為驚唔小心感染到病毒，驚自己將病毒帶畀身邊最重視嘅人。
討論區熱話：D人咩事又搶廁紙？
除咗以上轉變，香港喺過去嗰短短個幾月仲出現咗好多從來未見過、諗都冇諗過嘅奇怪現象，將來疫情過後，大家回想返，可能會忍唔住發出會心微笑。
更多文章：疫症見人心！網民：一個口罩睇清楚好多人
1. 搶購廁紙變例行日常
自香港開埠以嚟，打劫金舖就聽唔少，但打劫超市搶廁紙，你又聽過未？但咁奇特嘅事就正正發生喺今時今日嘅香港！大約2月初，網上流傳一段消息來源不明嘅錄音，話好多廠家打算留起製造廁紙嘅原料用嚟整口罩。於是唔知係咪受錄音影響，好多香港人就開始瘋狂買入大量廁紙，搞到超市嘅廁紙貨架Keep住空空如也！聽聞而家必須要留意定超市返貨嘅時間，然後快手出擊，先可以確保去完廁所有廁紙用⋯⋯
2. 囤積白米將屋企變成糧倉
好多香港人最近都開始囤積白米，逢親見到超市有貨就忍唔住買咗先，驚死遲啲會買唔到咁。都明白大家最近在家工作加上唔敢出街，又或者想盡量慳口罩，所以多咗機會喺屋企食飯，對白米嘅需求可能會增加咗少少，不過，其實一包8公斤嘅白米，即使一家幾口人咁食，點都夠食一頭半個月吖，咁又使乜一次過買定幾包米積喺屋企做庫存呢？如果要搵原因，可能因為到目前為止，疫情都未見到有「快將好轉」嘅迹象，所以大家都開始擔心呢種日子仲有排過？
3. 行山人數激增
近排除咗原本有行山習慣嘅行山友，香港各大山頭仲湧現咗好多之前冇行山習慣嘅市民！最近日日都留喺屋企唔敢出街，就算出街都一定要戴口罩先安心，香港人一方面好耐冇呼吸過新鮮空氣，另一方面又覺得做運動有助增強抵抗力，所以好自然就揀咗行山呢項可以親親大自然，又可以順便舒展筋骨嘅活動，最緊要係，山頭上人口密度低過市區好多，大家可以享受除低口罩，舒舒服服咁呼吸新鮮嘅感覺！
更多文章：在職父母抗疫心聲！在家工作＝困獸鬥？ 網民：畀我靜下得唔得！？
4. 個個變身「織女」、「科學家」
平時真係十年都唔攞一次啲針線出嚟，但自從口罩變得貴過黃金之後，大家為咗慳錢紛紛開始自製口罩，由本身唔識睇紙樣，到後來變身專業「織女」一次過整十個八個，整埋畀親戚朋友都仲得！
以前讀書最差就係理科，見到個元素表就頭痛兼眼瞓，但為咗慳返買貴價酒精搓手液嘅錢，最近竟然同啲甚麼乙醇、異丙醇、甘油同雙氧水做咗朋友，成個「科學家」咁將啲化學材料倒嚟倒去，成功自製酒精搓手液！
5. 善心人士唔係派米派口罩
喺「一罩難求」嘅情況下，好多低收入人士，或者上唔到網睇消息嘅老人家，都面臨口罩嚴重短缺嘅苦況，好多撲到口罩又有善心嘅人都會主動免派口罩畀呢啲有需要人士，希望幫得幾多得幾多。每次見到呢啲守望相助嘅舉動，都忍唔住覺得香港人真係好可愛！
