雷大囡同佢嘅前世情人雷囡爸爸感情非常好，話佢係宇宙最強小三真係無錯（而家仲有個小四）。晚晚臨瞓前雷囡s同雷囡爸爸都一定要傾下「枕頭計」。唔傾過果晚都唔肯瞓，感情好過我囉。（有少少葡萄咁囉）
而我就會係佢地傾完「枕頭計」後先同爸爸傾返雷囡每日情況。大家對下口供，併砌返完整「故事」出黎。諗下有咩方法應對，真係父母唔易做，哈哈！
其實聆聽孩子心聲真係好重要，晚晚同雷囡有優質嘅傾心事環節，呢點雷囡爸爸真係做得好好。我當然都唔弱啦，雷囡s都同我一日傾到黑，有時俾佢地嘈到我暈暈地。
其實雷大囡係個鐘意將心事收埋嘅人，要佢講心底話真係唔容易，所以我都會經常主動同佢講心事。用心聆聽佢講野。佢先會信任我同我傾心事。我好享受同佢可以好似朋友咁傾計。仲成日傾計傾到半夜十二點一點都唔肯瞓。雖然好攰，但真係好開心架。

而雷小囡從學講野開始都好鐘意同我地傾計架，佢好多野講，攪到我日日都好似玩「超級無敵估歌仔」咁。我地全家人已經當左係一個好好嘅「親子遊戲」喇！

曾經聽有啲媽媽講過：「小朋友5歲前都冇記憶架啦。」、「一日到黑講埋晒啲無聊野」、「大啲先傾啦」....亦有見過啲媽媽係小朋友講野嘅時候直接無視佢、甚至叫佢：「唔好嘈！」。
我都明白有時啲小朋友真係講唔停口，特別係啱啱學講野。或者係幼稚園「問題兒童」，每事問、乜都問、係又問、唔係又問嘅階段。有時佢地真係嘈到我有啲暈暈地。但幾細個嘅小朋友都係有感覺架。如果你俾佢感覺到父母唔想聽佢講野。覺得佢煩，甚至唔尊重佢。慢慢佢會唔想再同你傾計。就算五歲前嘅記憶冇左，但習慣係唔會咁易改變。所以聆聽，溝通應該係一個習慣，要從小開始。無論小朋友講嘅內容有冇意義都好，一定對親子關係有好嘅影響。
內容授權： 雷囡媽媽 LuiLuiMaMa Facebook 專頁
