無論有冇宗教信仰，每對新人結婚嘅時候都一定會許下承諾：「無論順境或逆境，富有或貧窮，健康或疾病，都將永遠愛對方」，但如果有一日，你發現當初深愛嘅伴侶染上毒癮，吸毒、欠債、講大話乜都做齊，完全變成另一個人，但考慮到屋企仲有兩個得七個月大嘅BB，你會選擇毅然離開伴侶，定係堅守婚姻承諾，陪另一半共患難，一齊戒毒渡過難關？
有太太以「我老公吸毒 我好灰 我應該點自救？」為題開Post，佢發現老公自今年4、5月起開始吸食有「貴族毒品」之稱嘅可卡因，次次都應承話會戒毒，但轉個頭又周圍借錢吸毒，至今已經借咗七、八十萬，仲成日講大話，令樓主心灰意冷，但屋企仲有兩個只得七個月大嘅BB，樓主一方面唔想BB冇咗爸爸，但一方面又擔心會對BB有不良影響，陷入咗進退兩難嘅局面，甚至自己嘅精神都開始失控……
更多文章：家人染毒癮，應該點做？戒毒機構社工建議3個應對方法
此Post一出，即刻引嚟好多網民留言，大家同樣都建議樓主為BB着想，但就分成咗兩個完全相反嘅見解，如果你係樓主，你會揀Plan A定Plan B呢？
Plan A. 期盼浪子回頭：搵專業機構協助＋幫老公轉新電話
樓主話老公本身為人都唔差，成日幫人，而且都幾錫樓主，平時唔捨得買嘢都會留番錢買畀老婆，但自從開始吸毒後，成個人完全扭曲，同以往判若兩人！
正所謂「心病還須心藥醫」，好多網民都鼓勵樓主先嘗試了解點解老公會開始吸毒，「咩事令佢會吸毒？」、「佢係咪好大壓力？」、「如果佢肯戒，搵啲機構幫吓佢啦，BB仲咁細」。
網民建議樓主積極向戒毒機構尋求協助，始終兩個BB仲細，如果離婚，樓主要獨力湊大兩個小朋友都唔容易，而且BB成長階段冇咗爸爸陪伴亦會有所缺失。有位網民話，BB可能可以成為爸爸戒毒嘅動力，只要成功戒毒，同埋唔會再接觸到吸毒嘅朋友或者毒品賣家就冇問題：「戒呢種毒品過程唔難，難係難在之後再被人誘惑，心癮要過好耐先會真係斷，如果期間再接觸到貨源，咁99%會食返」。所以樓主最好幫老公換個新電話號碼，盡量幫佢重新過新生活，如果情況許可，最好搬埋屋，等啲損友搵唔到佢！
Plan B. 恨心一刀兩斷：返娘家＋報警＋離婚
部分網民覺得如果樓主繼續包容老公，等於縱容佢繼續吸毒，為咗BB着想，樓主應該恨心啲：「離開佢啦，BB周圍爬，唔小心掂到佢啲毒品再食入口點算？」大家建議樓主為咗BB嘅安全，換屋企門鎖又好，或者搬返娘家都好，應該離開咗老公先：「狠狠地離開佢，佢或許才會醒悟。」、「如果佢真係愛頭家，就會醒同自救。」
不過有另一批網民就覺得，吸毒呢家嘢基本上係冇可能戒得甩，即使戒到一段時間，將來亦有可能再食返：「一個爛咗個男人，可以離開佢嘅就離開佢啦」，而且最好一不做，二不休，報埋警兼搞離婚，其中有網民獻計：「當佢有貨喺身時報警拉咗佢，再入紙離婚」、「叫佢屋企人報警，唔好諗住話咩留案底冇前途呀、畀多次機會佢呀嗰啲，咁唔係幫你老公，……放任佢只會係死路一條，命都冇仲怕咩留案底！」
樓主：「希望堅守婚姻嘅承諾。」
樓主見到咁多網民為佢加油打氣，都覺得好感激大家，不過佢念在過去同老公曾經恩愛又幸福嘅日子，打算畀多次機會老公：「我就係一直堅守婚姻嘅承諾，所以我一直都冇離開佢，希望可以同佢一齊面對，我而家叫緊佢搵機構幫忙。」呢種不離不棄嘅愛真係好令人感動！
點都好，無論樓主最終揀Plan A定Plan B，大家都鼓勵佢為咗啲小朋友要振作起來，千祈唔好諗埋一邊，最好間中搵人幫手湊吓小朋友，畀自己小小空間休息、放鬆吓，又或者考慮到樓主老公吸毒可能有機會被捕，建議樓主計劃定如果自己要出去工作，要安排搵邊個湊小朋友。
最後想同樓主講聲：「加油呀，你啲小朋友好需要你，要堅強呀！」
24小時社工戒毒熱線：186186
WhatsApp或WeChat禁毒即時通訊諮詢服務*：98186186
*服務時間為每日上午十時至下午六時
