懷孕過程中可以話係過五關斬六將，密密做檢查，頻頻去添置寶寶嘅用品，已經夠忙到一頭煙。然後加上有過百種不知從何而來嘅懷孕禁忌，唔可以做呢樣、唔可以做個樣⋯⋯ 真係會令人無所適從。不如一齊嚟破解6大懷孕禁忌，俾準爸爸媽媽安心度過艱鉅嘅十個月！
更多文章：【親子急急問】新手爸爸媽媽 迎接BB回家前準備工作清單
更多文章：【親子急急開】睡眠大作戰 3個方法建立幼兒定期睡眠作息
1. 唔好揼釘！唔好拎剪刀！
傳統禁忌認為孕婦拎剪刀、揼釘會生「兔唇」或有缺乏嘅寶寶。婦產科醫生表示，要造成寶寶兔唇嘅原因係相當複雜，可能係環境或基因等因素影響而成，同拎釘或拎剪刀無關係，認為呢項禁忌係當初怕誤傷懷孕婦女，而定下呢個禁忌。
2. 未足3個月唔好同人講有咗呀！BB 會小器呀！
唔通3 個月後公佈喜訊，BB就唔小器？ 其實以科學角度解釋，懷孕12 週前嘅胎兒比較唔穩定，流產嘅機率係1/5，因此大家都會比較謹慎，等胎兒發展得穩定先對外公開，以免造成失望，所以與其他人分享與否並唔會引致流產。
更多文章：【親子急急問】母乳寶寶生病 全因媽媽食得不夠好？醫生：無關係
3. 唔好拍膊頭/搭膊頭！
實質係避免突然拍膊頭，會令孕婦受驚嚇以引發子宮收縮。另一個講法係，肩膊位有一個肩井穴，若大力按壓，可能會造成宮縮，提醒準媽媽要特別小心，其他親朋都避免嚇親孕婦喇！
4. 唔好抬高雙手！或者拎高處嘅物品
並唔係無科學根據㗎！懷孕後肚子隆起，重心位置改變，自然有行動上嘅限制，容易因為重心不隱而跌倒。若果唔小心撞到肚，可能導致子宮收縮、胎盤早期剝離。提重物時個肚用力、肚壓上升，亦有可能壓到胎兒或胎盤，的確要小心為上。
更多文章：【親子急急問】新手媽媽睡眠不足 專家：加速衰老3至7年
5. 唔好搬屋、搬嘢！特別係搬床！
喺傳統觀念嚟講，係擔心動到胎神，而對胎兒不利。喺科學嘅角度，係擔心懷孕婦女喺搬屋期間太過勞累，而造成流產、早產或胎盤下墜。盡可能等寶寶出生後先搬屋，或準媽媽不參與搬屋事項。
6. 唔好食咁多豉油呀！BB 皮膚會變黑！
BB 皮膚黑或白，基本上主要由父母嘅遺傳基因決定，色素亦唔會直接通過胎盤傳俾BB，所以唔存在食豉油變黑、食珍珠粉變白嘅講法。反而要注意豉油鹹度高，孕婦吸收太多重口味調味品而水腫。
7. 唔好做運動呀！容易小產㗎！
成日都聽到人講懷孕嘅時候做運動可能會傷害到BB，甚至造成流產或早產，但其實係無科學根據！如果孕媽媽身體本身無咩不適，做運動可以保持身體健康，亦令到生產時更加順利，因為懷孕可能會帶來妊娠糖尿、高血壓等等與肥胖有關嘅疾病，所以孕期間記得要做好飲食控制同適量嘅運動，對於媽咪同BB都有益！但亦提醒孕媽們要揀適合自己身體狀況嘅運動，唔好一下子挑戰太劇烈嘅動作呀！
另外假如孕媽媽懷有多胞胎、作早產、妊娠毒血症、高血壓、子宮頸長度較短、胎膜破裂或胎盤前置等，就應諮詢醫生意見先，同埋避免做劇烈運動。
Baby Kingdom 環節：「親子急急問」每個星期都會請來專家，解答爸媽最切身的疑難！
