早排政府建議將法定男士侍產假由3日增加到5日，議員張宇人就表示「侍產假一日都唔應該有」，話自己太太、啲女同新抱都咁生仔，「以前我哋冇侍產假又點呢？」咁話喎。講真，見到係嬲嬲地！
啱呀，以前啲人住山洞茹毛飲血添，又點呢？又唔見呀張生倒退返去咁生活？其實張生有樓住、有熟嘅食物都係「永無止境嘅苛索」嚟架，反省下喇。
網民比我厚道，但都忍唔住問：使唔使咁講嘢啊？男士有幾可用到侍產假啫，而家邊有人生十個八個先？都係一個起，兩個止架喇。女性需要時間適應母親呢個角色，男性都一樣。睇過有研究話，男士侍產假有助減少產後抑鬱，多參與照顧BB亦有助家庭關係。其實呢啲好處，都係呀媽係女人一樣咁易明啫。迎接新生命之後，老公應該喺屋企幫手直至新手媽媽稍為習慣，先放手畀老婆一個人面對。老婆生完身體未恢復，加上荷爾蒙影響，冇老公支持真係抑鬱都似。
Juicy媽有嗰句講嗰句，唔係貪佢幾日假仔囉。時代唔同，而家夫妻嘅家庭角色定位，已經唔係以前咁刻板「男主外、女主內」。女人可以賺錢，男士都要為家庭付出。好多地方侍產假政策都比香港完善，人哋德國講緊放幾星期，我哋爭取得嗰三日都未搞得掂呀陰公，你話幾可悲。唔講外國，好似另一個議員莫應帆咁講，中國大陸都有侍產假喇，人哋都進步過我哋喇，係咪應該檢討下。
不過對於某啲僱主嚟講，你「全家都好幸福喎」關佢鬼事咩，返少日工佢就覺得自己蝕到入肉架喇。
講開又講，呢位議員真係噏得出就噏。講咩唔好，走去鼓勵大家退化？冇嘢啊？
