趙bb 滿左月，亦即係趙c9 經歷生bb 呢件大事都過左一個月好想趁仲有記憶既時候，好好咁紀錄下喺仁安醫院生bb 既過程
原本趙c9 並唔係揀仁安生bb，但因為種種原因，最終要喺呢度生（好彩感覺良好）
去到醫院，先喺大堂登記辦入院手續，房間類型分標準，半私家同私家，趙c9 揀左半私家，因為想靜啲啲同時間可以選擇母嬰同室，但需要隔離床既媽媽都係呢個意願先得架，當然我都有揀到
好快辦妥手續，就有職員帶我上產科樓層上到樓層，護士問左我一大堆身體狀況既問題，再講解育嬰流程，時間表,又會介紹所有設施等等…同時間會抽血，量血壓，剃陰毛…喺護士站有一項最重要要要即時決定既係幫趙bb揀奶粉醫院都提倡母乳餵哺，但頭一兩日未必上到奶，但bb都需要食奶粉架，所以要揀定餵邊款
攪掂哂，就有護士幫媽媽做胎兒監測，大約30分鐘就可以入房休息喇
房間都幾大，酒店式設計，每張床都有電視，衣櫃，保險箱，房間仲有雪櫃添（講多次，趙c9 住半私家，其他房係點我唔知架）
安頓好之後，就拆下禮物包先? 基本上就有齊嗰幾日喺醫院既日用品 - 毛巾，牙膏，牙刷，杯，紙巾，拖鞋，沖涼洗頭液.. 當然仲會有產後衛生巾，網褲，床墊，生理沖洗瓶，羊脂膏，而開刀既媽媽仲有束腹帶??
除此之外，醫院會有每人一壺冷熱飲用水，仲有供外用既薑水添，抹身，洗頭，洗手都得，唔夠同姑娘講就可以喇
基本既就講到呢度先，遲下再分享喺仁安醫院生bb 後既醫院育嬰資料—餵奶，母嬰同室，親子時間…
小提示
- 如果可以選擇，記得辦手續時要選擇新翼，因為較近育嬰室 (生完盡量唔好行咁多嘛)
- 記得帶件有帽既外套
- 醫院有風筒同洗面盆提供
--------
相關文章>>>
仁安醫院生b part2
