在職楠媽如何由一固到兩固呢？楠媽好幸福，有明白事理嘅長老們。
其實當楠哥準備加固既時候。楠媽同楠爸從認識BLW之後就去學習。睇書、上網參考別人嘅心得。
學會要點之後就不停幫長老洗腦（笑）
．不停講BLW嘅好處（長老們骨子裡還是愛孫的）
．去討論區度比佢地睇下其他BLW BB嘅成果
．告訴佢地邊餵邊BLW嘅風險
．灌輸佢地正確嘅概念，將知道嘅都話佢地知
．最後就係BB開始食得好嘅時候邀請佢地一齊共餐
楠哥代到一餐之後，大約過了一個月。楠媽覺得佢已經好懚定，所以第一次邀請99一家來我家一起共晚餐。（楠哥是由99和我媽咪輪流照顧的。）
好記得當日一放工回家，依舊匆忙地準備好楠哥的晚餐。我邀請咗99進來廚房，告訴她要怎樣煮⋯
「99呀～我而家想煮一次楠哥嘅晚餐比你睇，你望下啦。遲d想你幫手煮楠哥嘅午餐呀。（邊煮邊講mode⋯）螺絲粉呢要烚15分鐘，要夠淋呀！BB白汁就要咁咁咁煮，佢未試蛋白架，落蛋黃！遲d食得蛋白再話你知吖。菜只要莖既部分不要葉，咁快比葉佢會噎親呀。肉要切手指咁長，要薄d、鹽一定不要落呀，因為咁細個食鹽呢會增加佢長大後有心血管病同高血壓嘅機會架，千萬唔可以！三文魚煎香，唔煎佢攞唔到呀~總之你煮嘅時候幻想一下你係完全唔識用餐具，只能夠用手，咁點會易攞d呀？呢個諗法就幫到好多。」
99會有好多問題問，例如：
BB用油怕唔怕唔健康？
食粥先會有營養架!
咁樣食到周圍係無家教！
我未見過人咁樣食。
佢便便見到食物，係唔係消化唔到？
食完都係比支奶佢?好似有營養D woo...
所有問題媽媽都可以用自己嘅知識去解答佢。(當然要先有個明白事理既長輩啦。)
及後就是一起進餐，佢見到楠哥食飯自己食，又無話噎親，佢都覺得好開心又好神奇，佢話未見過bb咁樣食飯，又讚佢好叻，我就一直提醒佢要一起吃，楠哥會學佢。雖然偶然有少許gag，99都好緊張。我就抓住呢個時刻教佢點做，叫佢冷靜，好快楠哥自己處理到，唔好嚇親佢。佢感受到咩叫gag，完全唔係佢所諗嘅噎親，佢睇起上黎都接受了。我馬上補充一句，所以煮嘅時候要留意食物嘅質地夠唔夠淋⋯⋯如是者，就過了一餐。
自此，99無再著眼於噎唔噎呢個問題上，我都鬆咗一口氣。至於食材方面，我初頭會推介佢某幾款，當有新嘅食材可以比楠哥食又會話比佢地知。溝通真係好重要。
今次到我呢個新抱要碎碎念了（笑）諗返起其實都幾好笑架。我那來咁大嘅膽子要教99煮送又教佢湊仔（哈）
同一星期我又邀請咗我媽媽重覆一次。
幸好99同我媽咪都係位明事理嘅人。尊重我地嘅教養方法，並一齊實行，又肯學新事物。各個育兒方法，除咗堅持之外，所有照顧者行為態度一致是非常重要的！有佢地幫手照顧楠哥，做就咗呢個小吃貨嘅出現。
通常代餐我會找個星期六週末自己試先，成功嘅話就交比我媽媽/99進行。
又係星期六嘅時間，8m12d，楠哥代兩餐了。
Happy BLW,
楠媽
相關閱讀：
【楠哥BLW二三事】BLW小知識-Gagging vs Choking
