請到一個好姐姐並不容易。有港爸日前在社交媒體發文，分享家中印傭由一張白紙做起，直到現時可以「自動波一腳踢」打掃買餸煮三餐，而且任勞任怨，將一家六口照顧得十分妥當，更指姐姐工作多年都仍然盡心盡力，令網民十分羨慕。
該名港爸日前（11日）在Facebook群組「表揚好姐姐開心分享區」發文，分享家中印傭精心烹調的3菜1湯的照片。港爸指，印傭21歲時來港入屋工作，由一張白紙開始做起，頭2至3個月與她一同煮食，隨後讓她自己慢慢嘗試，幸好姐姐算聰明，只需教導1、2次已學會，「同埋佢會問問題，點解要咁樣、點解要落呢個之類，我整乜嘢新嘢佢都會企喺度學」。
港爸一直很有耐性地教姐姐，而且基本上沒有罵過她，因他相信「你對人好人對你好」。姐姐亦沒有辜負港爸的期望，一直用心照顧港爸一家六口，當中有老人家又有小朋友，姐姐煮飯時會思考到各人的需要，「姐姐煮飯都會諗老人家有啲唔食得，有時中午飯仲要分開煮，因為要夾兩個仔放學時間唔一樣，老人家又要食先，我都佩服佢」。
姐姐由初時「乜都唔識煮、唔識做」，到現在每日早早起身照顧小朋友上學、打掃買餸煮三餐飯，「全部自動波一腳踢，任勞任怨！」姐姐對工作的熱誠令港爸十分感恩，最近續第3張合約仍然盡心盡力「無跌watt」，用心煮新菜式，而且「續約都完全無扭過計」。港爸又笑言，太太在印傭的協助下可以休息，並指「我兩個仔朝早返學全部姐姐搞掂，阿媽夠膽死9點幾先起身，啲仔已經出晒門口，姐姐都打掃咗一朝了」。
相關帖文隨即引起網民熱議，有不少人表示十分羨慕，「我個由白紙入屋，到而家3年都好似白紙咁，保持住」、「你姐姐好勁，又有天份又有心機」、「羨慕死，我嗰個有一半識自動波打掃就好」、「你真幸福，遇到咁好嘅姐姐」、「睇啲餸菜就知姐姐有耐性、肯學、用心做……心心眼」。
文章及相片來源：「表揚好姐姐開心分享區」Facebook
