回想起拍拖嘅時候，老公真係好完美，做咩都好美好，每日都過得好幸福。但！自從同C6結婚後一齊住，呢個諗法已經慢慢係腦海入面消失，全因對方嘅生活陋習開始漸漸浮現！係同一屋簷下共處，真係隨時「眼火爆」！
「相見好、同住難。」生活上當然有好多細節要2個人去慢慢磨合，但互相遷就唔代表要獨自啞忍，所以唔少JM都會係討論區大呻C6嘅壞習慣。當中絕大部份就同C6嘅衛生習慣有關，污糟邋遢、無手尾、唔換衫、搞到屋企垃圾崗咁等等等等……JM們隨時慘過做阿四！
「掀起廁板底有啡黃水漬，唔抹根本無可能想坐落去。」
「密密撩鼻屎，跟住彈到周圍都係！」
「唔係日日換衫，用完嘅口罩掛晒係廁所唔掉。」
討論區熱話：有冇人C6好污糟
討論區熱話：有冇人C6好污糟
C6嘅邋遢行為真係永遠都講唔完，但以下呢幾個就肯定係大部份JM們都有嘅心聲，究竟C6們點解可以污糟到咁？真係完全理解唔到呀！
屋企廁所當公廁
每次同JM們講起呢個話題，大家都會不約而同默默點頭，點解男人去廁所永遠都會出界？見到廁所板或地下有漬又唔會抹返乾淨？有無諗過女人係要坐係到去廁所架！每次幫手抹個下，真係會覺得好嘔心好核突！
無手尾
啲嘢用完唔會擺返原位，只會貪方便隨手周圍擺，廁所燈亦從來唔識用完就熄。例如擠完枝牙膏就咁掉係洗手台、食完嘅碗碟就咁擺係枱、垃圾隨處掉等，幫佢執手尾執到人都癲！
唔沖涼就訓上床
每次C6收工，嘴邊總會掛住一句：「好攰。」呢個時候佢哋總會好自然咁碌上張床到話要休息一陣。唔係唔畀你休息呀！但你可唔可以唔沖涼住都換套乾淨衫先訓上去呀！有無諗過你老婆要同你呢隻「污糟貓」同床共枕㗎！
幾日都唔換衫
唔換外套都話可以接受，但連底褲同底衫都懶得換就真係人神共憤！返咗一日工，出咗成日街，就算你話自己無出汗都成身細菌，仲要著幾日？！即使有想攬實C6嘅一刻，都會即刻彈開！
周圍食嘢周圍跌
見到C6食薯片、食餅真係會隨時吐血！點解佢哋咁鍾意係床或梳化上面食？仲要每次食到周圍都係，見到成地碎都只係用手掃兩掃就算，咁樣好易會有小強入屋！
JM們如果真係不幸地遇到一個咁惡頂嘅C6，同朋友呻過後，不妨平心靜氣同返C6講下自己感受，用正面及婉轉嘅語調去溝通，得閒又提下佢，久而久之對方總會明白體諒而作出收斂，因為大家之間仲有「愛」呀！
