聖誕節係個普天同慶嘅日子，對於渴望成為父母嘅夫婦嚟講，相信無咩禮物好得過「中獎」嘅消息，但其實有咗同結婚一樣，如果你認為只係兩公婆嘅事，少年你又太年輕啦！
呢個咁開心嘅消息，除咗你兩口子高興之餘，仲有伴隨住四大長老期待以久嘅喜悅，佢哋嗰份熱情，真係足以浸死你！
討論區熱話：奶奶知道左我有BB 高度介入
最近就有JM喺討論區分享，當99知道佢有喜之後，簡直係高度介入佢嘅生活，除咗起居飲食，仲有一連串中國人迷信嘅習俗，真係幾乎舉手投足都係錯，呢份關心真係令人好困擾！而其實呢啲經歷又點會係冰山一角，一眾JM都不禁分享自己嘅遇到嘅奇人奇事。
「老人家覺得自己講嘅嘢就一定係啱！」
「最怕人迷信，為免傷和氣，哦哦哦對佢就算，如果唔同住就簡單。」
「樣樣都管住曬又無科學根據...可能我讀書讀science，nutrition呢啲，所以特別反感！」
雖然話係咁，但其實有唔少JM都明白，四大長老係出於一番好意，而且有咗BB之後，自己都會有所避忌，始終「寧可信其有，避得就避囉！」，講到尾都係為咗小朋友好，之但係聽住99日哦晚哦，確係令人好難釋懷，其實良好嘅婆媳關係都係建基於互相尊重，要做到真正家有一老，如有一寶，各位99們可能都要好好調節一下喇！
討論區熱話：奶奶知道左我有BB 高度介入
