講到要同四大長老同住，自不然就會飄出「相見好，同住難」呢句潛台詞，之但係「有頭髮邊個想做癩痢」，有好多人都基於唔同因素而需要「被同住」，例如：經濟問題、方便照顧等等，要數得出一個自願同住嘅理由，都確實唔容易！有JM甚至話寧願住劏房，都唔會同6299住，而其實公道啲講句，即使係自己父母都未必夾嘅時候，仲要話同人哋父母夾，都真係個「非常任務」！
「同自己父母住都會有磨擦，何況6299。 」
「同住可免則免，但盡量住近啲，方便照顧。」
「同住5年啦，相處係藝術；如果你從來認為畫畫係嘥時間、送花不如折現、畢加索係傻佬的話，不要同住，因為相處係一門抽像沒準則嘅藝術。」
討論區熱話：會唔會同四大長老住？
討論區熱話：會唔會同四大長老住？
普遍嚟講，若然有得揀，大家都會寧願選擇同四大長老住近啲，以方便照顧，同時又可以緊密聯繫，但講到同住？真係即使平日同6299有幾老友都好，都好難話鍾意到要歡迎兼自願地邀請佢哋同住，始終係人哋父母，有時想坐得豪爽啲都怕無禮貌啦！
講到呢度，有人可能會話四大長老養到你兩口子牛高馬大，今時今日要照顧佢哋都好應該呀，甚至有人會話：「你估人哋又好想同你住呀？ 」，其實啱咖，你有選擇時，人哋都有選擇，可惜世事就唔係樣樣到你揀，要焗住一齊住又係另一個故事，正所謂針唔拮到肉唔知痛，旁觀者總係指責多多：「其實都係加雙筷啫，有咩咁難為！」、「又唔係你養！」、「應該又應份咖！」，老實又有邊個鍾意背負呢個「唔孝順」嘅罪名，之但係一諗到當你教緊仔女嗰陣，有人喺身邊指手畫腳就真係火燒心，所以同住呢個問題，真係打從心理同生理都唔太接受到！
不過世事總有例外嘅，無人話同四大長老住一定係死路一條，話晒頭獎都有人會中啦，希望你係幸運嘅一個啦！
