夫妻相處之道，易學難精，有人嫌老公唔夠投入，有人嫌老公太過黐身，這邊廂有人慨嘆老公一日都無一個電話，那邊廂就面對奪命追魂Call，咁到底一日Call幾多次先算係中庸之道呢？相信呢個問題本身係無既定答案，要尋求最理想狀態，始終都係要靠夫妻彼此磨合先有「最佳答案」 。
話說，早兩日就有JM喺討論區大吐苦水，講到另一半要佢寸步不離，每次約朋友出街食飯都會不停打電話畀佢，以各種理由及事件要求佢返歸解決。呢位「黐身老公」嘅行為，令JM嘅朋友們都大叫怕怕，繼而逐漸疏遠，婚姻可以話令佢無晒朋友，生活就剩返老公同小朋友。
JM表示曾經都試過同老公理性討論，但對方就直言怕太太受到嘅花花世界引誘，開宗明義要佢斷六親；講到呢度，有唔少JM都話頂唔順「黐身老公」：「愛您都要私人時間輕鬆下架.... 」、「佔有慾好強，好有壓迫感。」、 「會覺得自己似坐牢！」
其實講到兩老婆相處，老老實實真係不足為外人道，但提到「黐身老公」呢個問題，原來都有唔少人都備受困擾，到底「黐身老公」係如何育成咖呢？係因為個人自信較低？定係受性格影響？又或者同成長背景因素有關？甚至係活喺過往不快個案陰影之中；如果對方唔願意分享背後原因，可以嘗試從建立信任方面入手，例如介紹身邊朋友畀佢認識，將你嘅朋友變成佢嘅朋友，令佢喺圈子入面地位得以肯定！又或者再簡單啲，將手機、手機殼貼滿老公同小朋友嘅相，比「黐身老公」知道佢已經完完全全黐喺你嘅隨身物品上面，真係人唔在精神都在啦，試問時刻都見到自己有個咁好嘅老公同家庭，仲有咩可以破壞同引誘呢？
人與人相處，有時候都係靠呃呃氹氹延續同鞏固，氹氹下就一世咖喇！
