講錢傷感情就係人都知，但最弊一個家裡面係冇可能唔講錢！經營家庭需要龐大開支，樣樣都係錢啊陰公。兩夫妻要傾掂數平衡收支，真係唔係咁容易！有網民就發現另一半有啲私己錢，另一半更因為呢件事而講大話⋯⋯老實講老公有自己嘅錢唔係大問題，但鬼鬼祟祟咁令人好不安！究竟啲錢會拎嚟做乜？（養小三？賭錢？借畀豬朋狗友？⋯⋯忍唔住胡思亂想！）
有網民認為另一半有私己錢都情有可原，有時想有自己自由嘅使費，唔想吓吓交待，甚至可能留嚟畀驚喜老婆仔女呢（係就好嚕）～重點係管得太嚴，對某啲人嚟講係會有反效果！愈被管，愈想追求自由⋯⋯亦有網民奉行財政獨立，自己儲自己錢，有咩開支再夾份。咁就唔會有私唔私己嘅問題啦～
對於應唔應該容許另一半有私已錢，網民都有唔同意見。而最重要嘅一件事，當然就係⋯⋯溝通！喺呢件事中，樓主介意嘅唔係錢銀，而係對方唔誠實！要拆解呢個問題，就要搵出另一半需要講大話嘅原因。
Juicy媽就覺得一世人兩公婆，最好有咩都可以開心見誠講出嚟啦。尤其是牽涉到信任嘅事，更加要及早解決！
