唔知你心目中嘅24孝奶奶係點咖呢？要同你方向一致，幫手湊孫、做家務，仲要係聽晒你講，唔好舉一反三，總之最老土嗰句，就係當正你自己個女咁錫，咁就最Good fit？之但係，講真呀，人嚟咖嘛，唔係自己個女就唔係自己個女，更況且你估佢當正你係自己個女又真係好咩？
有時做阿媽，真係好煩，自己都覺得自己煩嘅同時，你會嫌你阿媽煩，你阿媽又會嫌佢阿媽煩，世界上似乎就係無完全唔煩嘅阿媽，自己阿媽就話點反抗，點拗交都無隔夜仇啫，但嗰個點講都係人哋阿媽，所以有唔少人都覺得最佳嘅婆媳關係，就係保持距離，好似呢位JM咁偶然病咗，有奶奶煮飯佢食，聽落真係夠晒完美，而重點最重要係「偶然」！
遇到呢種奶奶當然要感恩，不過個人就認為更重要嘅係相輔相成，人與人之間嘅相處，你點對人，人點對你咖啫，查實佢又唔係你，梗有唔啱傾嘅時候嘅，所以呢位JM都話只要記住互相尊重、包容，保持適當距離，先係萬全之策！
至於講到因為土地問題、經濟環境，一定要同奶奶同住嘅JM，還是退一步海闊天空吧啦，點佢寶貝仔做嘢？梗係唔使旨意，好嘅咪佢做埋，唔好嘅？即係搵交嘈啫！你幫佢做家務，又唔合佢心意，佢幫你洗衫又怕洗壞啲衫！始終大家成長環境同生活習慣都係唔同，所以你話距離同包容係幾咁重要呢！
最後，明白有啲野蠻奶奶會得寸進尺，JM們就唯有自求多福……
