大家有睇開我寫嘢應該知我係鐘意物業投資，而我就係人地所講果啲廢老，只信磚頭。但幾年後嘅而家，我有少少改變，因為我怕煩，香港嘅物業好多我都轉左做紙磚頭，即係一啲地產類嘅股票，當然今次嘅跌市，我都瀨咗野，無計架，自己嘅決定自己要認。但好好彩，我暫時實體物業重係佔我自己資產7成以上。
更多文章：理財個案—24歲，目標30歲買樓
自己咁鐘意樓，點解要揀紙磚頭? 其實我只將香港嘅物業去轉，國內既我係無轉到。其實一個好大嘅原因係香港嘅物業回報已經去到同國內城市一樣，我中山出租得3厘，香港嘅扣埋稅3厘都無，而其它國內地方我有部份物業可以去到6-7厘(當然又會有一大堆人沖出黎唔信，你咪唔好信，關我X事)，咁我自己就覺得點解香港咁? 原因其實係租金跟唔上升幅，而租金上唔到嘅原因，就一定係因為人工跟唔到升。所有嘅野都話我知，香港投資物業，無乜肉食，維修成本極高，裝修費貴，但你叫我賣晒香港嘅我又唔會，因為我一定會保持住一個數量或總價，點解? 因為我唔敢沽空香港物業市場。
香港嘅物業我唔係唔想投資，而係因為辣招等等，已經搞到個投資市場無利可圖，當然之前幾年有好多人教人去做劏房等等去拉高個回報，但我前年到去年，已經講過唔好做，因為裝修費貴，又有機會俾屋宇搞，終歸高處不勝寒，社運加疫症，將好多賓館都轉做套房去捱，而一堆本來高價既套房就陣亡左，裝修費都未收番就收左皮。劏一間劏房10萬有多，一間屋劏4-5間就用左5x萬，我係裝修佬就一定賺，你賺唔賺我就唔知，俾我再賤啲就間緊嘅時間報寸，又起又拆，收兩份人工，你都咪話唔過引。
更多文章：財爺的定息安揭其實想玩乜？
當然你可能會話香港嘅物業租金係甜品，樓價升先係主菜，呢個我都知，我諗無人投資物業係唔會知呢個道理，但以現時環境，我係接近捱都捱唔住佢，咁我重點等到個主菜上枱呢? 所以我先去投資紙磚頭，當然可能今次賬面係輸，但某程度上佢係賺到靈活性，同埋唔洗接電話叫我去通渠，你自己點揀? 我唔知，我只係講緊我自己嘅選擇，而唔係叫你去選擇。唔好過幾年後，又捉我出嚟鞭我屍，你知喇，我講嘢都係老作同唔負責任架，我講明先呀。
