大家好呀，又係我YO媽同大家繼續分享下澳洲大不同，今次繼續講飲講食啦！
記得之前同大家傾過嚟咗澳洲咁多年，加上疫情又無得飛返香港，除咗掛住香港家人同朋友之外，就一定係香港嘅美食啦。上次同大家分享過，因為以前西澳華人唔多，對亞洲食物梗係無咩需求，亞洲嘅餐廳食肆選擇真係唔多，所以十幾年前，如果有杯凍檸茶、凍奶茶飲真係又開心又滿足！
不過，前幾年開始有港式茶餐廳喺西澳出現，一聽到有鐵板餐、生炸雞肶、凍檸茶等等香港美食，大家都會搶住去試。記得嗰時我哋會開車40分鐘食一個午餐，可能都係香港人開嘅關係，成間餐廳都係講廣東話，特別有親切感。有朋友過來探我，一般大家玩咗一星期以上都會掛住香港嘢食，所以我都會帶朋友去嘗試吓澳洲嘅香港口味茶餐廳，估唔到個個朋友都話仲好味過香港，不過價錢當然比香港貴少少，好似一個午餐，包杯嘢飲要澳幣18元（折合約港幣105元）。不過喺外國食到咁高水準嘅港式口味，計落唔算貴！
更多文章：【幾個移民媽】移居到外地 過時過節倍思親？Yo媽：氣氛愈來愈好
仲有香港人好鍾意飲茶，依家西澳真係越來越多粵式酒樓。以前聽朋友講，因為無港式飲茶，父母嚟到澳洲無所事事，又無得去茶樓吹水，所以都唔願意留喺度，個個都要返香港嘆一盅兩件！但依家就唔同，好多出名嘅點心師傅都嚟咗澳洲，開設港式茶樓，口味啱哂香港人！連我媽媽都話好耐無食過呢種懷舊港式口味。所以準備移民嘅大家，真係唔使怕老人家無嘢啱食。
好啦，今次就講到呢度！下次再同大家傾吓計。
利安環球物業創辦人及執行董事張肇麒（Terence）回想起年少時到澳洲生活，每當回港探親時都會必定要先到餐廳食燒鵝、雲吞麵、菠蘿油等各或各樣的美食。他更會在回港前先預備好清單，準備到香港後按照清單上的餐廳大快朵頤。Terence直言：「日日食漢堡包，真係有時會食到口寡寡」。在香港長大的他，長有一個「香港胃」。幸好當時與父母一同移居澳洲，媽媽會為他準備一日三餐，「口寡寡」的問題不算太嚴重。他指出，現時世界各個大城市都有不少亞洲以至港式餐廳，準備移民的大家不必太擔心。
