大家好，又係我YO媽同大家講吓香港澳洲大不同，今次一定要同大家分享澳洲飲食文化。大家一聽到澳洲就一定聯想到澳洲龍蝦、鮑魚、 生蠔………下刪幾百款美食。
更多文章：【幾個移民媽】搬到外地無外傭幫手？專家：要有耐性地接受新生活模式
其實嚟咗西澳頭幾年， 除咗生蠔係又新鮮同平之外, 真係無咩游水海鮮可以選擇,因為外國都習慣食冰鮮海鮮, 一般漁市場都好少見到游水海鮮，嗰時就會諗起香港西貢嘅游水海鮮真係有好多選擇。
不過最近幾年，可能亞洲人多咗，需求又提高，西澳都有2、3間大型漁店由香港人打理，仲有好多游水魚、龍蝦、蟹等等…過時過節依家都可以蒸返條海水嘆吓。加上魚嘅種類仲好多，我哋成日都有大大條紅衫魚、黃花魚、牛鰍魚…每次媽媽去買魚都好開心咁話，香港呢D魚好貴，同埋唔係成日見到。
值得一提梗係澳洲牛排，我習慣去本地肉店買肉, 好似係香港咁鍾意邊舊就要, 要幾多都得。不過啱啱到埗，唔知啲部位點講，同埋外國人食嘅部位同我哋食嘅又唔一樣，以前好難買到牛𦟌、牛仔骨、買嚟買去都係牛排、牛腩……
但係依家就唔同，資訊科技發達咗，肉店老闆都為咗亞洲市場需要，店面依家有好多部位嘅選擇，好似我咁多年都會買成條牛柳，原來我食咗咁多年都唔知，外國人都無特別分，原來嗰條牛柳叫封門柳，喺香港是好熱門。
繼續講就一定係生果蔬菜，超級市場一般供應不同種類嘅生果同蔬菜，不過我哋有時鍾意去農場買就新鮮好多，食落去真係有分別，同埋價錢真係平到你唔信，好似新鮮提子, 我哋會去提子農場買, 因為可能現場即摘，所以粒粒提子都係特別爽脆。
更多文章：【幾個移民媽】澳洲睇樓買樓大不同 移民專家：三個重點要留意
其實一次真係講唔完澳洲既新鮮食材, 下次我會再同大家講吓澳洲嘅亞洲美食, 就算我哋依家無得返香港, 都可以解一吓我哋嘅思鄉病。
利安環球物業創辦人及執行董事張肇麒（Terence）分享過來人的經歷，他笑言自己初中時移居澳洲，幸好當時爸爸媽媽一同到當地展開新生活，他們每日回家後有住家菜吃，故此沒有患上「思鄉病」。回想起當時每逢假期回港探親，仍必定會到盡掃香港的美食，「日日食漢堡包都食到厭！」不過，Terence表示近年澳洲也開設了不少亞洲菜式的餐廳，故此打算移居當地的家庭無須擔心西餐食到「口寡寡」。
