又係我YO媽同大家傾吓計，最近身邊真係好多朋友選擇移民，離開香港，有啲會去英國、有啲會去加拿大、有啲會去澳洲，相信大家過去之前都一定會做好資料搜集，而最令大家關心都不外乎衣食住行！之前都有分享過買屋、讀書嘅小小貼士…不如今日同大家傾下點可以融入外國生活！
更多文章：【幾個移民媽】搬到外地無外傭幫手？專家：要有耐性地接受新生活模式
我10年前選擇澳洲，係因為工作原因，如果你畀多一次機會我，其實澳洲都一定係我首選。澳洲有幾好？因人而異啦，我都有朋友過來唔夠一年就回流返香港，原因好簡單，一個字，悶。十多年前來澳洲，因為工作關係我都去晒所有省，但最令我一見鍾情就係西澳。當年西澳好落後，所有店舖5點關門，超級市場星期六日都唔做生意，好多餐廳酒樓星期日都唔一定開門，所以好多香港人覺得呢啲生活點過呀？但係相反呢度就多咗好多親子時間同家庭樂，咁睇會唔會開心啲？
過來澳洲初期，好多時購物都會同香港比，嘩點解呢樣咁貴？嗰樣咁貴？成日會對返港幣，其實咁好唔公平，因為依家我哋係賺緊本地收入，用返本地開支計好正常！如果真係同香港比，咁喺香港食嘅只會係冰鮮澳洲牛，但呢邊會係以平一半嘅價錢食新鮮澳洲牛。既然選擇得移民，就要嘗試融入當地生活，喺外國地方買香港嘢食就一定無香港咁平，但偶然買嚟慰藉一下心靈思鄉，貴少少都將就一下啦……正正因為需求大咗，近2年都可以買到好多香港小食，其實我覺得已經進步咗好多，起碼超級市場9點先關門，星期六日仲會營業到5點。
更多文章：【幾個移民媽】澳洲睇樓買樓大不同 移民專家：三個重點要留意
另外澳洲人工作好慢，但你又唔可以話佢哋效率低，因為佢哋係慢活生活，呢個亦都係香港人最常投訴嘅日常事，想開個上網要成個月？睇醫生無即日睇？特別係一啲壟斷嘅服務公司，呢方面真係到依家都無改善…一樣係咁慢…但係睇醫生都已經改善好多，晚上都有好多醫生應診。
香港人初來人家嘅地方，要時間適應在所難免，但我都想提一提大家，諗吓移民初心係咩？如果真係咁唔捨得香港，就唔應該考慮移民……
利安環球物業創辦人及執行董事張肇麒（Terence）指出，移民熱點如澳洲、加拿大、英國和美國，都算是四個截然不同的地方。因此，當大家要挑選移民目的地時，「第一件事都係，你鍾意邊一個國家。」另有五個重點必須要注意，包括天氣氣候、當地周邊地方環境、挑選學校、居住地方的治安再找合適的房屋。在他而言，曾移居澳洲的他仍以當地作為移居首選。Terence笑言，加拿大經常冰天雪地，距離香港亦較遠，加上有較長時差的問題，故不會選擇加拿大。至於英國的氣候同樣一般，「所以我都係揀返澳洲，對比會大少少」。
當要面對有語言的轉變時，Terence提醒大家不用過於著急，「英文都要時間同要磨練」，可以讓小朋友參加學校的活動，透過與當地的小朋友交流和玩樂，便可以慢慢融入當地生活。最重要的還是要勇於嘗試新事物，便可以更快適應新生活。
