從生死到珍惜生命，從了解到實踐，「生命教育」呢4個字睇似簡單，不過就包含住不同層次嘅認知，長遠影響小朋友成長；有人會覺得小朋友年紀仲細嘅時候，根本唔適合，甚至唔使同佢講生死問題，久而久之到大個就自然會明？
更多文章：子女虐心的約定：「天堂門口等」 面對生離死別如何灌輸生死教育
而事實上，「生命教育」或者嚟得比我哋想像中突然，更有可能隨時搵上門，若然真係要等小朋友心智成熟先去探討，咁較細嘅小朋友遇到親人離世，作為家長莫非要掩耳盜鈴式呃住佢先，咁樣嘅表達方法又會唔會為小朋友帶來唔好嘅影響？小編今次就特意請嚟協康會教育心理學家黃俊傑先生（Rex）深入淺出如何與小朋友談及生死議題，道出生命教導嘅重要性。
更多文章：點解小朋友需要「生死教育」？家長可由5本圖書入手！
編：小編
Rex：心理學家黃俊傑先生
編：其實小朋友幾多歲先適合講同佢哋探討「生死問題」 ？
Rex：小朋友幾多歲都有機會接觸生死，我哋應該考慮嘅係以咩方法，同咩方式去表達，而唔係著重年齡分野。
編：係咪真係大個就自然識面對？如果缺乏指引會唔會帶來咩壞影響？
Rex：當然隨著成長，我哋會對死亡有更多認知，或者有更多接觸嘅機會，不過家長喺小朋友成長階段中，亦可以循序漸進向仔女講解生命與死亡。
幼稚園或更早階段嘅小朋友，即係喺5至6歲之前，比較難去理解死亡，但我哋都建議以事實陳述作為根本向小朋友講解，例如話死亡之後，身體唔會再郁動，同時死亡係不能逆轉；若然以「瞓咗覺」、「去咗旅行」向小朋友解釋死亡，或者會令佢產生恐懼，例如將去旅行同死亡掛勾，小朋友有機會對「旅行」有所畏懼。
到咗小學階段，小朋友可以進一步掌握死亡定義，而去到高小，大概10至11歲嘅小朋友透過具體接觸同生活，甚至新聞等等事例，基本都能夠完全掌握及明白生老病死，但不代接佢哋懂得面對。
相關討論：約定下世再見
編：如果家長覺得「唔需要」，或者逃避生命教育，對於小朋友情緒上有咩影響？
Rex：任何學習都需要分階段吸收，生命教育亦一樣，家長可以透過繪本向小朋友作出初階教育，對往後梳理小朋友情緒都好重要；首先，面對親人離世，喊或者傷心呢啲表現都係好正常，即使係成年人亦唔需要喺小朋友面前過於遮飾自己情緒，又或者將傷心同懦弱畫上等號，令小朋友唔敢輕易表露情感，或過於抑壓。
另外，亦應該耐心去聆聽小朋友對於死亡嘅疑問，減低佢哋嘅疑慮，如果要帶小朋友出席同死亡相關嘅儀式，可以先作出預告，話佢哋知，現場或者有好多人表現不捨又或者喊。對於唔同嘅親友過身，傷心程度亦有分別，呢個都受著個人與離世者親疏度有別，不過都屬於正常表現。
編：最後面對唔同宗教背景嘅家庭，都有唔同嘅生死演說，對於推廣生命教育時，係咪都係一個難題？
Rex：有部份家庭有自己嘅信仰，其實係可以成為面對死亡嘅共同支援，當中可能包含住鼓勵，以及其他對生命本身嘅重要信念，不過如果無宗教背景嘅家庭，亦唔需要急住去為「死亡」搵一個「答案」，唔知就答唔知，唔需要勉強，作出事實陳述就可以。
