今日爸爸有嘢做出咗去，
收到媽媽send張相嚟，
話你貪玩用原子筆畫咗張飯枱兩吓。
你好驚我會嬲，
又好自責自己做錯事，
媽媽話你好快已經知錯同認錯。
「講咗幾多次唔可以畫枱！」
「點解你明知唔啱都做？！」
「你自己擦返乾淨佢為止！」
「其實畫花張枱有幾咁閒？」
「我以前畫學校張枱仲花啦！」
然後我返到，
一入門口你就話有嘢同我講，
但係未開口已經想喊。
我踎低叫你過嚟，
攬住你拍拍，It's ok。
「爸爸好欣賞你誠實認錯，
不過你畫花咗張枱，
我地要諗辦法整返靚佢，
你諗吓可以將呢兩劃變做啲咩？
我地食完飯一齊畫。」
食完飯之後，
我地一齊搵圖片參考，
跟住嗰兩劃，
就變咗你最鍾意嘅Spiderman。
你勁開心：
「以後Spiderman就可以提我喇～」
／
曾經聽過一個講法，
小朋友之所以教極都係要講大話，
係因為大人處理小朋友犯錯嘅方法／説話太可怕，
所以小朋友寧願搏一搏都要講大話隱瞞。
我好同意。
你有好行為，
唔應該係因為怕做錯事我會鬧會嬲。
如果唔係萬一我有咩事早走咗先，
咁你就gg喇。
