香港人呢幾個月都過緊啲好唔自在嘅生活，唔單只學生停課，大人嘅返工日常都大受影響，一係就被停薪留職甚至裁員，好彩仲保得住份工嘅，有啲就在家工作，有啲就要承受住喺交通工具上受感染嘅風險去返工，以前「日常生活」會做嘅出街食飯、約朋友玩、行街Shopping等等，全部唔做得！已經差啲唔記得出街唔使戴口罩嘅生活係點！
討論區熱話：大家停左娛樂, 停左出去食飯, 停左去行街,覺唔覺得剩左$
不過，討論區就有JM提出，正正因為乜都唔做得，所有活動停晒，所以剩咗唔少錢：「大家停咗娛樂，停咗出去食飯，停咗去行街，覺唔覺得剩咗$，我發覺我剩到，原來平時使多咗」。
呢幾方面確實慳咗錢！
其實諗深一層都係，娛樂、飯聚呢啲都唔算係必要嘅消費，所以好多時啲大家想慳錢都會先從睇少場戲、食少餐街外飯入手，今次因為新冠肺炎疫情爆發，大家焗住唔可以娛樂消遣，變相都真係慳番唔少開支，唔少留言都表示同意樓主嘅講法：
「剩多咗好多，少出街食飯，原來自己煮慳咁多」
「是用少咗，以前一星期總有3日左右出街食around 300，嗰到原來都幾千，留家日日煮係使少咗」
「使少咗，而家時勢會諗清楚先買」
「小朋友學課外活動cut咗」
「今年上半年唔去旅行就真係慳咗幾萬」
但反而多咗其他方面嘅消費⋯⋯
之不過，都有好多JM留言話雖然慳咗出街食飯嘅錢，但係就用多咗錢嚟買防疫用品，口罩、消毒酒精忽然間變晒做「必需品」，而且價錢比以前貴咗好多，但又唔買唔得。加上留喺屋企反而用多咗水、電、煤，同埋經常唔小心手滑網購買多咗嘢！
「但網上買多了嘢！防疫用品都用多了＄」
「我都覺得食品價格貴了，又用多咗錢買抗疫用品，買下玩具圖書畀個女解悶」
「唔覺呀，街市買餸好貴，超市靜靜雞加價，買好多平時唔會成日買嘅消毒用品、紙類，真係唔覺用少咗錢」
「唔覺，小朋友冇得出去放電，買咗好多書、練習、board games、手工材料⋯⋯」
香港人共通點：開心指數低咗好多
其實慳咗定使多咗，都好睇平時嘅消費習慣，有啲人本身每年使好多錢去旅行，今年真係可以話慳返；有啲人自己喺屋企煮就會想買貴價高質食材，變咗反而貴過出街食。但無論係慳咗錢都使多咗錢，相信大家嘅共通點都係：開心指數低咗好多⋯⋯
「雖然慳左錢， 但我唔鐘意甘生活， 我希望好似疫情前那樣生活⋯⋯會掛住餐廳美食， 我好想好想去食燒牛肉、 打冷、天婦羅、食cake嘆咖啡」
真心，相信好多香港人都同Juicy媽一樣，已經好耐冇出去見過朋友，冇試過悠閑地high tea了，連平時無憂無慮、好容易就開心嘅囝囝囡囡，都因為太耐冇返學、冇社交活動、冇得出去放電而悶悶不樂，真係人都癲！希望疫情可以快啲過去，大家可以快啲過返以前嘅正常生活啦！
