出院後, 傷口仲好痛, 一直打平瞓, 個背脊好辛苦…初初都薑水抺身, 隔左3, 4日, 因為仲係夏天, 頂唔順用好熱水沖涼(真心覺得坐月媽媽好勁, 可以咁耐唔沖涼), 肚池膠布濕左, 自己換過塊囉, 打開發現個肚池窿有些少黃色痴立立液體流出, 我叫老公買左黃藥水幫我抺走去, 同時見到肚池入面有粒白色圓形物, 唔知咩黎…
之後keep住有黃色液體流出, 肚池附近仲開始硬硬地, 可能傷口未好得咁快, 肚池窿仍然好痛,粒白色圓形物又好似含濃咁, 我唔敢篤穿佢, 老公話不如返威院問下咩事. 第2朝, 老公陪我去返威院之前住過既樓層, 我同姑娘講咁既情況, 佢話我未到覆診期, 唔會俾我見醫生, 我亦唔可以就咁走上黎, 唔啱程序喎, 但佢都有幫我打開膠布望下既, 佢話表面睇無事喎, 無發炎吖…咩都無做過, 唯有走囉.
情況仍然一樣, 肚池附近d肉越來越硬, 出院到覆診要2星期咁耐, 我同老公都有D擔心, 頂唔順我走左去睇屋企樓下普通西醫, 醫生話我用黃藥水清潔係正確既, 粒白色圓形物唔似發炎, 肚池附近d肉硬可能係儀器壓親, 都正常既, 黃色液體唔知咩黎, 話既然威院有覆診建議我等下, 唔駛太擔心. 其實我地都係傾左幾句,佢無收我錢, 叫我走.
終於等到覆診日, 我老公一早陪我去睇, 分流姑娘叫我留小便, 再等到有人嗌我名, 我去到一個好似另一個分流站既地方 (老公無跟黎), 有個著住淺藍色袍既女仔(件袍寫住doctor架喎), 明顯佢唔係一個阿姐, 但唔似醫生囉.
疑似見習醫生既女仔: XXX (我個名), 你無懷孕啊, 你走得架嘞!
我: 吓~ 我未見醫生喎 (無數粗口係我內心爆發, 我等左個幾鐘,醫生都無得見, 你叫我走)
疑似見習醫生既女仔: 醫生話你無問題, 你走得架嘞!
我: (開始燥底, 仍然抑壓住) 姑娘, 我唔係黎驗孕, 我黎覆診架喎, 我想見醫生.
疑似見習醫生既女仔: 你等等啦 (行開一陣)
疑似見習醫生既女仔: 醫生話你真係無問題, 你走得架嘞!
我: (堅嬲) 姑娘, 咩叫覆診啊!!! 傷口你都無幫我睇過, 醫生都無得見, 呢d叫覆診! 手術完我個傷口依家唔舒服, 我話我要見醫生啊!
疑似見習醫生既女仔: 咁…你等一等, 我再問醫生 (又行開一陣)
疑似見習醫生既女仔: 我同醫生講左嘞, 你等嗌名吖
面燶燶行去老公度準備講返威院呢個離譜既覆診, 姑娘又嗌我入醫生房. 好老實, 驗咩孕啫, 我都小產左咯, 肚又俾你開埋, 唔係依家同我講仲陀緊啊, 你要驗唔緊要, 你唔好驗完叫我走囉!
(待續) 仲未到戲肉
發表於 
返回列表
