少年成長今日: 0|主題: 15869

收藏本版

發帖

返回列表

跳至頁

查看: 7349 | 回覆: 4

無心的比較 [複製鏈接]

csir3290

子爵府

積分: 11047

1^#

發表於 19-7-21 11:56 |只看該作者 |倒序瀏覽 |打印

早兩星期，佢兩姊弟都派成績表，阿女返咗屋企冇耐就已經打電話俾我叫我估下佢考成點，根據往績阿女咁樣問得即係佢自己都覺得考得唔錯，最重要係佢叫我估佢來年升邊班。阿女學校去到五六年班就會將成績最好嗰啲學生分喺同一班，原來阿女下年升咗去A班即係最好成績嗰班，咁佢梗係開心。咁我就順便叫佢問埋細佬編咗邊班，點知佢話細佬話唔知道唔記得咗喎，咁我都估到七七八八，但係佢既然唔肯講畀家姐聽咁我又冇再追問。

嗰日我早咗返屋企，一入門口家姐已經好開心咁攞張成績表畀我睇，但係細佬仲好似冇乜動靜。之後我再問細佬攞張成績表睇，其實佢兩姊弟嘅成績都進步咗細佬仲進步咗成20名，但比起家姐細佬個成績明顯係冇家姐咁好。可能細佬介意成績冇家姐咁好，又驚畀我哋話佢所以佢唔係咁願意講。但係當我睇完佢張成績表嘅時候，我第一時間係讚佢進步咗亦都讚佢今次溫習努力咗，我哋已經覺得細佬嘅進步好大我哋都好滿意。佢聽完我咁講當堂個人都寬容咗好多。再問下佢編咗邊班，原來佢好介意自己編咗去E班，因為佢覺得家姐編咗去A班係成績最好嗰班佢就編咗去E班，所以佢就覺得自己成績唔好，其實我哋知道佢哋間學校四年班以下嘅班根本就只不過係順序咁編班，但係偏偏佢嗰級就有幾個比較曳嘅同學編咗落去同佢同一班，所以佢有啲介意同埋佢以為咁樣就係佢嗰班係最差。最衰就係家姐有意無意間都係咁樣同佢講。我梗係即刻同佢解釋返，佢哋三年班嘅編班唔係跟成績，只不過係按考試名次順序咁編，細佬後來都發覺佢嗰級有個全級考第五嘅都係佢嗰班入面所以佢先至冇咁介意。

後來我同老婆講返件事，我老婆都話家姐好多時有意無意之間都將自己同細佬比較，家姐成日覺得自己叻過細佬，所以有陣時講啲說話都會令到細佬有啲唔開心。幸好細佬個人比較樂觀又錫家姐，所以好快就會冇事。我哋兩公婆其實都知道唔好將佢兩個嚟比較，但係我老婆話原來佢兩個讀埋同一間學校佢兩個有陣時自己都會互相比較。我老婆仲講返原來前一晚佢哋三個喺房傾計嘅時候，因為細佬比較缺乏自信所以我老婆成日有意無意就會讚下佢等佢多啲自信，點知原來嗰晚佢哋傾計時家姐忽然同我老婆講話原來佢覺得媽媽好少讚佢，成日都係讚細佬。我老婆同我講返，其實我都覺得我老婆係真係比較少讚家姐，因為家姐真係可能比較叻，樣樣嘢都做得比較妥帖，所以對佢要求就高啲。相反因為細佬冇咁叻，成績冇家姐咁好我哋驚佢自己會比較，所以有陣時我哋真係會比較多讚細佬，希望佢多啲自信。我老婆仲同我講叫我搵啲時間同家姐單獨傾吓都提下佢唔好成日將自己同細佬比較。因為我哋覺得佢兩個其實都好乖同埋好叻。

今次呢件事提醒咗我哋雖然家姐能力高啲做嘢比較妥當，咁我哋對佢嘅要求就會高啲，覺得佢做得好係應該嘅。原來咁樣忽略咗佢嘅感受。所以有陣時佢就會將自己嚟同細佬比較等我哋覺得佢叻而多啲讚佢。我哋兩公婆以為只要唔將佢兩個互相比較就得。原來就算我哋唔比較佢哋嘅成績或者做事嘅好壞，但係佢哋都會將我哋俾佢哋嘅讚賞嚟互相比較。咁嚟緊當然我都會搵個機會同家姐單獨傾吓，另一方面我老婆都話會搵多啲機會俾多啲正面鼓勵家姐。

多過一個小朋友嘅屋企其實家長真係要諗吓點樣幫兄弟姊妹之間建立感情同埋正面關係，我哋絕對唔想見到兄弟姊妹之間因為互相比較同埋競爭而破壞大家嘅感情。記得當年我哋就係因為唔想家姐自己一個成長，將來到佢大咗嘅時候冇人同佢互相照應，所以先至決定生多一個。佢兩姊弟將來長大嘅關係係點就要睇我哋而家趁佢哋細個嘅時候點樣幫佢哋培養感情同埋建立關係。