這是我本人親身經歷...
係三月三十號到普通診所,驗到自己有身孕。四月頭,我就拎左張驗孕証明去威院內科,佢地未有即時安排見醫生,只係要我返屋企等電話。後來佢地因為聯絡唔到我,於是致電俾我先生,到左四月中,我先生唸住幫我去拎覆診紙,但我先生未能出示本人身份証副本,威院以此為由不受理。我唯有隔日再去,因為本身甲狀腺素低,需要每日食藥,咁我擔心D藥會影響BB,於是去問內科既姑娘,佢地就俾張粉紅色紙仔,叫我有野問醫生就寫上去,之後我又返去等電話。過左一個禮拜,威院冇回覆,之後我又去搵返內科,D姑娘要我再寫多次,個陣時我真係好嬲,點解一個問題,等完一個星期又再一個星期,都仲未有答案? 佢地仲叫我去睇專科,聽左呢句說話我仲火著,粒藥係威院俾我,佢地搞唔店冇時間覆我,就當我人球咁拋出去....既然你地問唔到醫生,點解仲要我再寫呢? 隔左幾日威院打俾我,要盡快抽血,個陣時已經係四月尾。
到左五月頭,我返工時作小產,佢地送左我去公司附近既東涌醫院,東涌個醫生話照唔到BB既胎心,加上我肚好痛,之後就轉入去瑪嘉烈,個晚照完超陰,醫生話個胎停止發育(另一個醫生就話個胎唔正常),安排朝早做人流,佢地話如果我未唸好,可以唔做,叫我去睇私家,我曾經要求佢地轉介去威院,佢地就話互聯網做唔到,於是等到朝早,我就辦出院手續,再去威院睇急症,個日威院冇安排入院做手術,有個實習醫生叫我返屋企,等個死胎自然流出,如果個肚真係好痛&流血不止先再入黎,個實習生都唔願再講多幾句(真係做又36唔做又係36),最後俾左份報告(寫有dead foetus)同病假紙。隔左幾日,咁ARM夜晚我個肚真係好痛&見紅,屋企人送我去威院,等左四粒鐘先見到醫生,不過佢話自己唔係婦產科,留院個度佢話唔到事,所以我就返屋企。
接住個日我去埋私家,又再照超陰,照完個醫生就話個胎&營養囊都係完整,同埋佢分析我呢個情況係作小產,但佢又怕我週期計錯,於是佢叫我觀察一個星期,如果佢有長大,就再跟進,否則就要做人流。咁我唯有再等,一星期後私家証實我已小產,佢寫左份轉介書俾我,之後我去威院睇婦產,呢個BOOKING係我驗到有孕既時候預約,去到之後,我俾左份野去COUNTER,再入評估室,入面個姑娘話唔知我有份轉介信,卒之又再等左兩粒鐘,個姑娘叫我入去唐氏個邊等叫名,當醫生叫我入房,照肚,就話只有塞藥,冇得安排做手術,我真係O咀囉...然後又約左時間,到左個日朝早,我去廁所,FEEL到下面有物體跌出,我即刻搵樽仔裝起,個日照完話我個子宮入面冇野, 同埋佢地又拎左個組織化驗,個日唔駛塞藥。
兩星期前,我去返威院內科覆診,醫生話我甲狀腺素唔夠,好易小產,又叫我即日抽血。到左今日,個內科醫生話下次有BB,要食粒半,直到覆診為止,上次要我食一粒,佢以為我有BB,但我其實一早已經將懷孕証明交左俾內科,佢地又點會唔知我有左???我同醫生講,自己有問過食藥既問題,佢話姑娘係唔會答到我,咁我寫左兩次紙仔俾佢地,咁即係佢地冇處理個問題囉~
我個BB已經冇左,經過呢件事,公立醫院俾我既印象係超級差!