香港年輕人上車難,樓價不斷升,一個豆腐潤單位都要4、5百萬,點買?尤其一班無父幹無屋企資助嘅人,只靠自己辛辛苦苦返工儲錢,要買樓真係好講毅力!最近討論區有位80後仁兄就Post話自己畢業做嘢已經10年,儲到100萬,希望同女友買樓預備下年結婚,不過心儀嘅「新葵芳花園」就由幾個月前嘅430萬升到460萬。話自己已經一日打份工仍難追大市升勢。樓主訴完苦,估唔到竟然有一大班人留言指摘樓主,用咩原因,睇睇:
「首期一成,一百萬點會唔夠?」
有唔少人鬧樓主呃人搏同情,係想營造出樓價太癲嘅「假象」,仲話100萬可以夠首期做到按揭,不過根據按揭公司資料,其實2手樓400萬以上要2至3成首期,仲有裝修、律師費、稅等加加埋埋,無150萬其實唔夠架。
「窮,就要住遠啲,一上車就想住葵芳?」
有人指摘樓主以葵芳地鐵站上蓋嘅物業作為上車之選,係大想頭,「充大頭鬼」,因為新葵芳花園位環境位置皆屬上佳,加上葵芳已經屬於市區,4百幾萬呢個價錢一啲都唔貴咁話;得100萬應該只夠買葵興山上啲洋樓咁話。
「咁遲先買?臨渴掘井!」
有人更直接質問樓主點解喺年中低位過一排時唔入市,同埋既然有計劃結婚,何不早早買定,宜家正值高位,當然貴咁話。不過買樓唔同買棵菜,有幾多人可以肯定幾時係高位幾時低位?宜家去指摘,未免太事後孔明喇。
「點解唔考慮租住先?」
呢個都係好多上咗岸嘅人成日講嘅說話,年輕人一話買唔到樓,就叫人「租住先」,話當年「自己都係租租下先買」,其實今時今日點同當年,宜家租金已經佔咗收入一大半,仲租住先又點儲到錢買樓?
其實觀乎負評者嘅口吻,其實都係上咗岸買晒樓甚至多層樓收租嘅人,嘗試合理化香港樓市癲嘅事。例如話樓主「窮,仲想買葵芳?」宜家喺香港有100萬現金都畀人話窮,連葵芳都買唔起,呢件事真係合理?正常?一群既得利益者,對未上岸嘅朋友種種打擊,其實就好似放工時間,金鐘站月台上咗車嘅朋友,明明有位仲死唔肯行入去,反過來指摘外面想上車嘅人係貪心。當世界已經變得唔正常,正常人反而被人覺得係癲佬。