上次講過, 行經一間士多門前, 見到擺賣緊嘅香蕉唔靚之餘仲要企硬高價, 搞到冇人問津......
早排又經過, 循例一樣望吓生果價格, 依然咁貴, 難怪每次行過, 都未見過有人幫襯.
好奇望吓店主到底係一個咩人, 點解會一成不變, 唔識因應生果嘅生熟程度而將價就貨呢.
一位老人家, 旁邊坐住另一位貌似係媳婦或女兒嘅人, 二人坐喺店內看守舖面.
見到後生嗰位對住老嗰位不停碎碎唸, 而且臉容極不和善, 被鬧者除咗目光呆滯臉無表情望住前方之外, 冇任何動作.
睇二人各自嘅態度, 令我呢個路人甲直覺上覺得, 佢哋平日都係咁樣相處, 一個打一個捱, 至於係出於自願抑或被逼, 只有佢哋先知.
後來每次經過, 我都會刻意望向店內, 想知道惡媳婦是否又在欺負家婆.
結果一時二人冇偈傾, 一時就只得一人看店, 冇乜再見到一個鬧一個被鬧嘅場面.
逢親見到年長一代與年輕一輩發生磨擦陷入僵局, 我就會諗起好多年前聽過一個電台傾訴節目.......
一個女聽眾打電話哭訴, 好後悔喺家婆在生時, 與佢成日發生口角, 而家對方過咗身, 諗返自己之前嘅行為, 追悔莫及.....
人都死咗, 於事無補, 所以主持人只好安慰道 : 問吓自己, 點解當時你會咁對佢,
如果你覺得嗰時嗰刻, 係要用嗰種態度對佢先至抒解到你嘅情緒, 咁其實你唔需要後悔......
就咁聽, 好似係支持女聽眾與家婆發生齟齬. 但諗深一層, 第一, 我哋唔係女聽眾, 領略唔到佢與家婆相處時嘅感受, 所以冇資格批判佢係啱定錯. 第二, 就算係佢錯, 佢已經咁傷心後悔, 冇理由再落井下石㗎嘛. 第三, 家家有本難唸的經, 既然死者已矣, 亦只能安慰在世嘅一方.
自從聽咗呢個個案之後, 日常每逢遇上涉及家庭倫理嘅二三事, 我就捫心自問 : 今次拗撬, 若然對方突然唔喺度, 我會唔會後悔今日咁樣對佢呢? 如果會, 下次就要忍忍, 如果覺得理在自己一方, 咁下次再遇同樣事, 依然會咁做.
活到一把年紀, 我覺得做人最大嘅懲罰, 就係心生悔意, 悔不當初.......
後悔要做未做嘅事, 後悔做咗某啲事, 後悔錯失某個人....... 而呢啲後悔, 往往返唔到轉頭, 所以更加搥心.
不過話又說回頭, 正如主持人所講, 當其時嘅決定, 係取決於當時心情, 所以有時當我為某啲事後悔到腸都跌出嚟苦惱不已時, 就會安慰自己, 我都係忠於當時嘅諗法啫, 鬼知事後會後悔咩, 如果有早知就冇乞兒啦.
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
我都係walking dead 粉絲、但韓仔走左、已經無mood追了,覺得美劇有個問題就係發得太大好易爛尾、加上知道有重要人物會死已經打算棄劇了
返回列表
