復活節有四日長假期,之前應承咗囡囡去睇海豚,所以15號帶咗佢去海洋公園玩!
今次去海洋公園多咗個新event,就係「親親動物月」!佢係會喺指定時間,有導賞員帶住動物俾大家近距離接觸,仲會有訓練員現場餵飼動,小朋友仲可以隨便發問問題添。
囡囡第一次見到雪鴞,同哈利波特入面嗰隻一樣架!好可愛!
我地仲睇左南極企鵝添!!
除咗親親動物,佢仲有個「動物碼拉松挑戰」,喺不同動物場館裡面有 QR code俾大家儲,每儲夠五個code就有啲優惠券送,儲齊二十個可以參加大抽獎。由於我同老公都好鐘意玩任務,所以我哋真係好努力咁不斷入唔同嘅館,最終儲到15個。雖然未儲齊,但每次一見到code都好興奮。儲咗落黎動物圖鑑,可以隨時開返出黎,俾囡囡睇返啲資料,又好玩又有得留念。
我囡囡嗰日最開心就係可以近距離親親海豚!海豚平時只可以坐喺海洋劇場遠望,但今次可以只係幾呎距離咁接近,佢哋好友善,導賞員仲介紹咗點分海豚男仔同女仔,點餵海豚BB,同埋日常護理嘅趣事!
仲有個小朋友至愛放電位 - 威威天地,我哋差唔多留咗兩個鐘喺到玩,囡囡玩到唔捨得走。有個新建成嘅超大型遊樂場,有彈床,有攀石,啱晒幾歲嘅活力小朋友跑來跑去。我個囡仲玩埋小火車同小型摩天輪,亦都係好適合小朋友玩嘅機動遊戲!
呢次去海洋公園經驗同之前好唔同,全家都有驚喜又enjoy,特別適合鐘意動物嘅小朋友。活動至5月14日,未去嘅可以趁機會帶小朋友去!