懷孕前後 今日: 0 | 主題: 329728

積分: 139

1^#

發表於 19-4-4 22:57 |只看該作者 |倒序瀏覽 |打印

本帖最後由 Msmrmo 於 19-4-12 00:08 編輯

由於自己有bb既時候，發覺仁安醫院開刀資料都係幾年前，就想寫返一個開刀生產記比有需要既媽媽做資料搜集。等各位第一次懷孕準媽媽有定心理準備

其實仲有第二日落床係點同出院程序，不過唔知大家有冇興趣，寫住第一日先

我地選擇早上9點開刀，所以要前一晚入院做準備，開刀前一晚6:30pm入仁安醫院，冇哂4人房upgrade 左去2人房，做哂登記就有職員帶我地去3樓產科，老公就係梳化等，我就去左見姑娘，核對資料，聽bb心跳，問問個人資料，抽血（怕有突發事要補血)揀食邊隻奶粉（揀左雅培HMO) 同問有冇指定兒科醫生（陳樹仁醫生）最後姑娘會即場剃陰毛。

跟住就去一間房，呢到老公可以陪住，首先都要去廁所留尿，之後就會駁血壓機同check bb心跳機，期間會有制拎起手，如果bb郁就要按一下，整個過程大約20分鐘，要視乎BB有冇郁，姑娘見耐冇郁會黎整下個肚，等bb郁下，心跳正常又有郁，就會放行可以上房！有姑娘帶入房會逐一介紹房內設施，我地明白哂就即刻落左去2樓食晚餐，因為之後開刀要介口，所以我揀左塊牛扒加鴨干

食完上房安頓好，老公就返屋企，我成晚就冇乜點訓過，個心好緊張，完全唔會訓得著，摸下個肚聽日就會見到女女出世，今晚係最後一晚感受同女女心連心，腳仔踢到肚皮既日子。係既興奮又期待同時都好唔捨得！

不過即使訓得著都唔會訓得耐，因為全晚會有姑娘拎胃藥啦，check 血壓啦，check bb心跳啦！既然訓唔著，我都爭取時間沖涼洗頭同做下面膜！就係甘渡過左開刀前緊張既一晚！

開刀當日早上6點我去沖多次涼同做多次面膜，換定手術袍，著起件袍都即刻開始緊張！所有內衣內褲都唔比著，都唔會尷尬，緊張既心情都蓋過一切！老公7:30am黎到，我地都好緊張好期待，準時8:00am姑娘們就推床入黎，我過床就推去手術室喇！老公暫時只可以陪到手術室前，我就入去手術室前既預備位置到等候。

係手術前既預備床，姑娘同我核對資料，會問知唔知宜家做咩手術，叫咩名；係預備床到等緊入手術室，主診張耀昌醫生已經到左，睇緊幾時有位到我地入手術室，除左有姑娘核對資料，麻醉師都會黎核對資料同講程序，仁安每一位姑娘都好好，有位姑娘不斷陪住我，到我入手術室果時知我好驚好驚，仲摸住我塊面話整個過程都會係側邊陪住我，叫我唔洗驚！當時老公都未入得黎，我訓係手術床，又再次核對資料，成個人都震哂，姑娘叫我唔洗驚唔洗驚，但好難唔驚！跟住左手被人打點滴，麻醉師全程都係我側邊，之後佢就同我講宜家會打2支針，我就要好似蝦米彎身，盡可能地膝頭彎向心口，原先我以為呢個過程會好快，點知都彎左好耐，仲會有2，3個姑娘協助，因為打針時絕對唔可以郁，所以佢地都會按實哂全個人，打完第一支係會感覺到凍一凍成個人控制唔到會震一震，大家就會好緊張講：唔好郁唔好郁！之後第二支都冇甘痛喇，打哂就會極速襯你仲有知覺即刻訓平，右手就駁check 血壓心跳，跟住會感覺到準備開始喇，姑娘都消毒緊個肚甘，我好驚試下自己郁腳指，發覺仲郁到腳趾公，我同姑娘講我仲郁到呀唔好開始住。佢笑住問我宜家抺緊個肚覺得凍唔凍，我話甘又唔凍喎！跟住麻醉師就同我講手術其實開始左。

全程我係望手術燈反光見到張醫生，如果唔係都唔知已經做緊手術，我老公係開始左之後好快就入左黎，有佢係隔離成個心都定左好多，老公陪產真係好重要！佢拖住我隻手，閒談下問下我野，跟住麻醉師推左我幾野、女女就出左黎喇！成個人都未輕鬆哂架，因為未即刻聽到女女喊聲，見到姑娘抱左去一邊清潔，好似隱若聽到幾聲喊聲，就叫左老公去剪臍帶，跟住就抱過黎我到影全家福喇！原先會諗會唔會喊，但我地都冇喊，但果種喜悅唔識形容，當拎左女女出黎之後，突然間手術室播住英文歌，成個感覺輕鬆哂！因為我仲有個子宮肌瘤要割，所以老公抱左陣就出去，姑娘就再抱女女比我望下同埋叫我錫啖女女，之後就抱左女女出手術室，老公就係出面等女女推出黎，即刻幫我影幾張呀女既相！而我就朦朦朧朧之間瞓下醒下瞓吓醒下，終於張醫生話完成喇！成個人先真正放鬆！又去番預備床到check陣血壓心跳，之後就有員工推番我去3樓，成個過程夾埋已經係2個鐘喇！

如果只係開刀生bb 整個過程只需要1小時！

完左手術到下午，兒科陳醫生就黎介紹自己，同埋佢影左好多女女既相比我地，仲即時send哂比我地，好細心呀！呢個時候既爸爸媽媽除左想聽一切正常健康，就係想睇下自己個寶寶！

「仁安醫院冇得比探訪者抱bb，全部都要係玻璃窗前睇。爸爸就只可以親子時間睇15分鐘。而媽媽都只係每4小時既餵奶時段見到bb！」

跟住因為插哂尿喉吊哂點滴，我呢日全日都落唔到床，去唔到親子時間都唔會餵到奶，老公就即日報左去親子時間抱女女，而我就會開始感覺到肚中心忍忍作痛，開頭誤會係傷口痛，後來醫生解釋返係子宮收縮痛，因為係開刀唔係順產，所以會落藥吊點滴甘樣令到子宮收縮返，就好似話比身體知bb已經出左黎。

而晚餐都仲未食到野只可以食粥水，不過頭呢晚都好累好眼訓，所以都蓋過哂肚餓係完全唔覺得餓！就係甘忍忍作痛地過左一晚，呢一晚都係不斷有姑娘進出，換下尿袋，睇血壓，食止痛藥，塞止痛藥。。。。。。

成個流程大約就係甘，正式做爸爸媽媽喇！
祝各位準媽媽順順利利！平平安安！

=================================
第二日

尋晚姑娘都不停進出，整下尿袋鹽水，塞下止痛藥！朝早姑娘話可以食得粥做早餐就幫我叫左碗皮蛋瘦肉粥（尋日只可食粥水）仲幫我拆哂尿袋呀鹽水呀！舒服哂，吉住隻手真係唔多方便。同埋叫我可以試下落床慢慢行下仲有要去廁所留小便。兒科陳醫生朝早都黎左講女女情況比我聽，好安心，醫生話一切正常！今次一樣影左幾十張相比我睇呀！自己仲未見到真人唯有靠醫生既相頂住引先！

跟住就到主診張醫生巡房，佢都會睇下我傷口靚唔靚同埋按下個肚，睇睇子宮收縮情況理唔理想，你問我開刀傷口痛唔痛，我會話其實真係唔痛，我覺得最痛係子宮收縮痛，醫生一定要按落去個肚到，呢下真係我覺得全個過程最痛！我係會忍唔住捉番住張醫生隻手求佢唔好按，哈哈。。甘佢又真係會又細力同好溫柔甘輕輕按下！

因為老公未黎到，而我又好想快d去餵奶室見個女,話哂自從尋日生完都未見過，個心好掛住！所以我就搵左姑娘幫我落床同換番自己帶黎既睡衣，姑娘都話落床果下係最痛既，我都小心翼翼甘。落左床比想像中冇甘痛，所以我就自己慢慢行下同去廁所梳洗下，留尿果下最麻煩，又要就住傷口，又要留落個兜到，仲要小心惡露整污糟隻手，唔怪不得話生完去廁所係整得最耐！等到就黎2:30pm 姑娘問我會唔會去餵奶，怕我傷口痛就叫左職員過黎推輪椅推我過去餵奶室（都岩既，我房都一頭一尾）

入到去會問房號，跟住洗手同埋坐係貼住「第一次」既椅子到等，跟住姑娘就會抱住bb過黎，互相對手帶，就會交比媽媽餵奶，仲好體貼會有姑娘教點樣姿勢餵人奶，期間有唔明，姑娘都會黎幫手！我終於都抱到個女喇！好興奮又感動，望住呀女個樣已經同係手術床到望果時唔一樣，著住醫院提供既衫仔同背心，抱上手好細舊好輕但感覺好硬淨，跟住姑娘會協助將bb個頭痴向乳頭，再整一整佢咀仔張開等佢吸下，（其實就未上奶，但都想比bb吸啜）個感覺好close 佢個身貼哂自己心口，咀仔又吸下放下，因為肚餓而媽媽又未有奶，仲會啜一啜就喊，成個過程好可愛好難忘，姑娘會建議吸15分鐘到就補奶粉，只要同姑娘講一聲食奶粉，就會拎之前已揀好牌子同岩分量既暖奶比媽媽自己餵，仲會教掃風，餵奶時間1個鐘如果都餵唔哂支奶，姑娘會示意媽媽番房休息，佢地會幫手餵埋未食完既奶！初生Bb食食下會訓著覺，掃風第一次，成日都驚拍痛佢，所以輕力到掃到佢舒服到訓左覺，就要姑娘幫手叫醒又繼續餵，跟住果幾日既餵奶過程就係甘喇！每次都會好享受呢個媽媽同女女最親密既時光❤️

講講同老公今日可以一齊去親子時間抱女女，我當然多數讓比佢抱，我仲有好多餵奶時間抱到佢，但爸爸就每日只有一次親子時間15分鐘抱bb。第一次親眼見到老公抱住個女，佢個樣冧到爆，對住女女講野都溫柔百倍，真係前世小情人💞

而仁安餵奶時段係隔4小時一次，2:30-6:30-1030-2:30 。我就等10:30pm餵多次奶就番房休息。半夜2:30am時段我就唔會餵，盡量比自己訓覺休息下！呢個半夜時段姑娘都預媽媽唔餵多，而平時既時段10分鐘內媽媽唔出現，姑娘就會幫你餵bb既！

我既第二日分享去到呢到喇！有時間再分享埋出院情況比大家聽！祝順利平安！

0 0 0

私人傳訊

積分: 139

2^#

發表於 19-4-4 23:01 |只看該作者

本帖最後由 Msmrmo 於 19-4-4 23:13 編輯

Msmrmo 發表於 19-4-4 22:57
由於自己有bb既時候，發覺仁安醫院開刀資料都係幾年前，就想寫返一個開刀生產記比有需要既媽媽做資料搜集。 ...

補上房間同產婦時間表相片

私人傳訊

yukicheung0901

積分: 1222

3^#

發表於 19-4-5 01:36 |只看該作者

我本身都係揀陳樹仁，點知我個醫生幫我揀咗嚴德文。我就冇揀到陳樹仁。

私人傳訊

Tongtongsweet

積分: 161

4^#

發表於 19-4-5 02:26 |只看該作者

Msmrmo 發表於 19-4-4 22:57
由於自己有bb既時候，發覺仁安醫院開刀資料都係幾年前，就想寫返一個開刀生產記比有需要既媽媽做資料搜集。 ...

多謝分享！祝bb健健康康！
期待第二日既分享呀！

私人傳訊

abcd123456789

積分: 1320

5^#

發表於 19-4-5 06:44 |只看該作者

Msmrmo 發表於 19-4-4 22:57
由於自己有bb既時候，發覺仁安醫院開刀資料都係幾年前，就想寫返一個開刀生產記比有需要既媽媽做資料搜集。 ...

追

私人傳訊

Irisssuet

積分: 166

6^#

發表於 19-4-5 11:31 |只看該作者

多謝媽媽分享

私人傳訊

aamanyu

積分: 1098

7^#

發表於 19-4-5 12:44 |只看該作者

謝謝分享，我都book佐張醫生，不過仲有個半月先生得！好多媽媽對張醫生都係好評

私人傳訊

BAO902

積分: 1432

8^#

發表於 19-4-5 12:49 |只看該作者

Msmrmo 發表於 19-4-4 22:57
由於自己有bb既時候，發覺仁安醫院開刀資料都係幾年前，就想寫返一個開刀生產記比有需要既媽媽做資料搜集。 ...

多謝你分享，我第一胎係順產，今胎會開刀，一直都好擔心，同你一樣係張e生，見到你個post，大約都知係點，多謝你,希望你快的康復

私人傳訊

積分: 139

9^#

發表於 19-4-5 13:24 |只看該作者

yukicheung0901 發表於 19-4-5 01:36
我本身都係揀陳樹仁，點知我個醫生幫我揀咗嚴德文。我就冇揀到陳樹仁。
...

陳樹仁都係我主診醫生介紹比我，就算之後落得床可以去見bb，但佢都每一日照係bb房影幾十張bb既相比我，覺得佢好細心同埋佢講解都好清楚又好親切！

私人傳訊

積分: 139

10^#

發表於 19-4-5 13:28 |只看該作者

aamanyu 發表於 19-4-5 12:44
謝謝分享，我都book佐張醫生，不過仲有個半月先生得！好多媽媽對張醫生都係好評
...

張醫生真係超好，即使每次產檢要等2個鐘我都覺得值得！好有醫德既醫生！因為我係中途轉醫生，更加覺得自己冇揀錯醫生！

私人傳訊

積分: 139

11^#

發表於 19-4-5 13:31 |只看該作者

BAO902 發表於 19-4-5 12:49
多謝你分享，我第一胎係順產，今胎會開刀，一直都好擔心，同你一樣係張e生，見到你個post，大約都知係點， ...

唔洗怕呀！全個流程係緊張但唔辛苦！同埋你揀岩醫生喇！佢開刀手勢一流！我見同房第二個醫生佢出院果日都仲好辛苦，幫佢洗傷口又嗌痛。但張醫生連洗傷口都唔痛我仲第三日已經上落床自如，係慢少少。第5日出院都仲行得幾快！

私人傳訊

yukicheung0901

積分: 1222

12^#

發表於 19-4-5 16:00 |只看該作者

Msmrmo 發表於 19-4-5 13:24
陳樹仁都係我主診醫生介紹比我，就算之後落得床可以去見bb，但佢都每一日照係bb房影幾十張bb既相比我，覺 ...

咁又幾好喎。早知我都揀佢喇。

私人傳訊

Sakura16

積分: 1259

13^#

發表於 19-4-5 17:04 |只看該作者

睇到我好緊張，眼濕濕.. (emoji)(emoji)
好感動.. 恭喜你

私人傳訊

pokipoki

伯爵府

積分: 15463

開心吸收勳章

14^#

發表於 19-4-5 19:01 |只看該作者

我都係睇張醫生，不過仲未決定去公立定仁安，你埋單要幾錢呀？

私人傳訊

jojowifman

洋房

積分: 79

15^#

發表於 19-4-5 20:05 |只看該作者

Msmrmo 發表於 19-4-4 22:57
由於自己有bb既時候，發覺仁安醫院開刀資料都係幾年前，就想寫返一個開刀生產記比有需要既媽媽做資料搜集。 ...

我想問陳樹仁兒科巡房費係幾錢一日呀？thanks.

私人傳訊

dunuknow_ww

別墅

積分: 626

16^#

發表於 19-4-5 21:17 |只看該作者

多謝樓主分享，我都仲有一個月係仁安開刀喇。想問一下有無限住爸爸一日只可報幾次親子時間？

私人傳訊

BAO902

積分: 1432

17^#

發表於 19-4-5 21:31 |只看該作者

Msmrmo 發表於 19-4-5 13:31
唔洗怕呀！全個流程係緊張但唔辛苦！同埋你揀岩醫生喇！佢開刀手勢一流！我見同房第二個醫生佢出院果日都 ...

我去產檢時都有帶埋個大仔去，張e生成日同我仔吹水，仲比左成十張超聲波相我個仔，他真係好好人

私人傳訊

積分: 139

18^#

發表於 19-4-5 23:21 |只看該作者

pokipoki 發表於 19-4-5 19:01
我都係睇張醫生，不過仲未決定去公立定仁安，你埋單要幾錢呀？

減返我割子宮瘤既價錢，預6萬9到啦！

私人傳訊

積分: 139

19^#

發表於 19-4-5 23:22 |只看該作者

jojowifman 發表於 19-4-5 20:05
我想問陳樹仁兒科巡房費係幾錢一日呀？thanks.

我唔知有冇記錯好似$1000 1日！但就冇指定醫生收費，好似個個一樣！

私人傳訊