篇文有d長，始終有3年幾既經歷-
我同老公16年9月結婚，結婚前2個月先去做婚前檢查，發現老公精子差D同埋有乙肝，我要打乙肝抗體，最快半年後先可以試造人。我同奶奶講佢個仔有乙肝我要打針，佢話咁打啦，之後我話不過要半年後先可以試生仔，佢即刻話咁唔好打喇，乙肝好多人都有架喇! 我同佢解釋佢個仔會傳染比我 (經性行為)，我有左會好大機會傳染比BB，佢都繼續話好閒者，有仔趁早生，生完幫我湊。果刻我覺得佢好自私。當然我最終有去打抗體。
半年多後開始試造人，試左幾次都唔得。我經期一向唔準，30-60日不等，加上我period紅色後keep住有啡色，10幾日先會清，所以去左睇中醫。睇左幾個月唔見有好轉，又去睇婦科，照到子宮有瘜肉，上網睇話瘜肉會影響著床，同埋會影響period後好似成日黎唔乾淨，所以我做手術切左佢，切完又係隔幾個月先再開工造人。果時18年差不多完結，後黎朋友介紹一個中醫比我睇話好多人睇佢成功左，我同埋老公一齊去睇，但佢D時間好難約，不過都睇左幾個月。同事叫我照下輸卵管，上網見到陳XX醫生果度有得照，約左去照，佢叫我老公做多次精子test。我地個report返左就上去見醫生，我左邊輸卵管積水，醫生叫我做手術一係夾住佢一係切左去，如果唔係就算有左，D積水會流出黎毒死或沖走個杯胎。2個手術我都唔想做，做左即係永遠廢左一邊。佢應該都知我唔想做，就話不過你仲後生，再試下用右邊先，試左一段時間唔得先做手術喇。而我老公個report今次好左。
老公叫我睇多個醫生先，同事介紹左個中環婦科醫生比我，公司有幾個女同事都係搵佢做婦科手術，諗住就算做手術都係搵佢。我帶埋report同佢講我個case，佢只係用陰超同肚超再睇埋我report話都唔係好嚴重者，比藥我食試下幫輸卵管消腫去水，同時食排卵藥同返去監察排卵，醫生話我左面輸卵管有改善。我睇左呢個醫生3個cycles，每次解答好詳盡，同埋真係好nice又funny，我最後一次睇佢時佢仲話”今晚返去要努力喇，如果今次得左我請你食飯睇戲!”我睇親佢都比到歡樂我! 但如果成日睇真係好貴，再加上呢次當我滿心期望時，點知我老公唔得。其實佢已經唔係第一次，前幾次我諗住佢攰所以我都冇勉強佢，冇辨法唯有等下一個cycle，但發生左幾次再加上今次比左幾千蚊睇醫生加食左好多藥，但佢唔得，我喊左好耐。我話佢其實一早有問題點解唔同中醫講，佢話以為休息下會冇事…..之後佢約左睇家計會，醫生話好普遍，有D男性緊張壓力大都會咁，開左D藥比佢，有時愛愛前佢要食藥，有時得有時都係唔得，我冇再比壓力佢，唔得就算，有時係佢自己比壓力自己。
之前已經同佢講過我地可能要試IVF，但香港好貴，要去台灣做。本身諗住試到今年去埋歐洲返黎先再搞IVF，結果疫情關係邊度都去唔到。二月果陣有個朋友同我報喜有左3個月，話想介紹個中醫比我，佢睇左1個月就中，佢家姐d frd睇左半年內左右都中左。
其實呢3年幾不斷見到好多遲過我拍拖或結婚既人都有左或生左，真係會好唔開心，奶奶又成日明催暗催我地生仔，我地已經壓力好大，令我更唔鍾意佢。我老公個堂細佬本身差D結唔成婚，因為比佢果時未婚妻知道佢出面食女，但個未婚妻原來有左先至話原諒佢。佢生完就成日催我地生，我心諗同輩就咪L嘈喇，成L日同埋D三姑六婆係度催。
我又係抱住一試無妨既心態帶埋老公去睇，由於呢個中醫易約同埋係食藥丸，我地差唔多keep住個個禮拜都有去睇，只係有時排卵後冇去。呢個中醫會根據你既週期教你幾時開工，其實我自己一向有睇app、用排卵試紙、睇有冇分泌物去判斷幾時排卵期，知道會有時遲/早左排卵。之前睇中環醫生時食左3個cycles排卵藥、黃體藥、荷爾蒙藥後，經期改善左維持35-40日就黎m，所以20幾日就會開始用紅d。我當然明白點會睇左一兩次就中，試左2個cycles都黎m，一黎m就好唔開心又喊，過左幾日自我鼓勵完又積極返。同時繼續睇IVF資料，已經同老公講可能要係香港做，佢話冇問題，仲已經講話約個醫生睇下。
期間繼續睇住中醫先，前2個cycles我地都有跟中醫所講係食同休息方面改進下，我老公就每日要飲保礦力，後來佢同我講佢仲買左樽zinc食。一星期有1-2日會跟老公去gym room做gym。到第3 cycle我好勤力，period後差不多每日自製芝麻黑豆漿(我老公都有飲)，又會每朝整木瓜(有時加埋士多啤梨)鮮奶，食2隻烚蛋。以為未到排卵期之前自然地do左一次，點知第二日再check紅d時深左d色，2日後同老公講聽晚要再試。我老公係家計會拎d藥食曬，未到覆診日佢要去藥房睇下有冇得配，比佢配到。佢配左一樣既藥，但唔知點解勁左好多，第一次勁到我叫攰。隔日中午黎多次後諗住休息，點知再隔日覆診中醫叫我地夜晚再補多次，聽到都攰。雖然之後3次老公都要食藥放鬆，但好彩佢都成功交功課。
排卵後一星期，我整左d sushi有青瓜，隔2日又食左涼拌青瓜，果個禮拜特別係頭幾日勁多尿痾，上網睇話青瓜利尿，所以由佢痾，後來先知尿頻係因為bingo左。期間個胸同個肚既感覺我覺得似黎m前d感覺，人地話有唔同，我就唔覺喇，再加上網上睇人地bingo徵狀都唔覺自己有。以前成日套徵狀，跟住一次又一次失望。今次我同老公都好似有放鬆左自己，我冇特別有期望。我個frd話要拜姻緣石叫我陪佢去，一齊上網睇介紹，話原來除左求姻緣仲可以求子。我本身偏向基督教，所以從來都冇去拜什麼什麼，既然陪左朋友黎咪又諗住一試無妨，但其實計返日子，陪朋友去姻緣石時其實已經bingo左，但既然我拜左，就要跟返習俗，出年成功生左就要去還神。
我一向排卵後12-13日就會黎m，從來唔會到第14日，但上一個cycle我patpat痕走去拎返之前睇中環醫生剩返既黃體藥黎食，食完變左第14日朝早黎。呢個cycle排卵後第12-13日一feel到好似有野流就勁驚，成日去廁所睇，等到第13日晚未黎已經估自己中左，但都係諗住睇埋第14日朝早先，不過成晚失眠。到中午都未黎就更加確定，但我再等第二朝驗左先到老公講。第二朝用左條過期綠d驗，終於見到有淺印，我冇好似睇電視咁勁開心同彈起，可能因為本身都幾肯定，只係等驗完confirm。
如果問我邊個原因令我成功自然懷孕，睇中醫? 飲豆漿? 飲木瓜奶? 食蛋? 做運動? 飲保磺力?食zinc? 老公食完西藥勁左令到d精子可以行入d? 真係唔知，感恩既係努力終於沒有白費，淚水過後終於得到微笑。仲有幾日bb就3個月喇!
希望大家好似我咁失望完好快又爬返起身，唔好放棄!
發表於 
返回列表
