2020-05-22

2.4K

【懷孕FAQ】孕期染髮會導致畸胎?孕婦染髮4大迷思!

懷孕期間諸多禁忌,孕婦承受唔少壓力!不過了解清楚,總好過得個驚字!

好多孕媽媽都好想知道,其實懷孕期間可唔可以染頭髮?皆因染開又唔染,頭髮生出嚟兩截色,真係有啲唔太美觀,但係坊間又流傳孕婦染髮有機會導致畸胎,影響肚入面BB健康同發育!咁到底又係咪真呢?今次小編就特別邀請咗葉蓉蓉醫生為大家解惑!

更多文章:孕婦的飲食日常:她們與「熱氣」食物的矛盾

小編=編;葉蓉蓉醫生=葉醫生

編:懷孕期間,其實可唔可以染髮?

葉醫生:一些小型研究證明,日常染髮嘅劑量並不會引致畸胎或胎兒出生體重較低等情況。但係由於無大型研究做過關於呢方面嘅問題,所以染唔染髮就真係取決於孕媽媽嘅需要。

編:有說過咗懷孕首3個月,再染髮就無問題,呢個說法又係咪正確?

葉醫生:的而且確胎兒喺首三個月內係比較容易對外來嘅因素,如:污染物及毒素比較敏感,如濃度夠高,更有機會令到器官嘅成長出錯,而有畸胎嘅危險。如果真係好想染髮,都建議喺懷孕期三個月以後才作考慮。

編:染髮對胎兒同孕婦有咩影響?又有人話會導致畸胎嘅染髮劑量,大概係孕婦要每天染髮3次以上先有呢個風險,此說法又係唔係正確?

葉醫生:理論上,染髮劑嘅化學成份並不會經皮膚大量吸收。但係如果皮膚有傷口、發炎或濃腫等情況,就會有機會增加吸收化學物到身體內嘅份量,繼而經過血液傳到胎兒吸收。

其實,喺動物研究內所使用嘅劑量都十分之高,所以如果喺正常情況下使用染發劑的話,現時嚟講,並無對胎兒或孕婦有特別影響。

編:如果孕婦真係需要染髮,又應該注意哪些細節?例如:染髮劑嘅成份、染髮方式及時間同孕婦身體狀況等?

葉醫生:如果喺平衡利益關係之後,仍然覺得染髮對自己好重要,就需要注意以下幾點:

一、使用染發劑時,必須戴上手套。
二、確保頭皮無任何損傷:如果頭皮有破損、發炎症狀,就唔適合染髮了。
三、盡量喺最短時間完成整個染髮過程,以減低皮膚暴露喺染髮劑下嘅時間 。
四、喺染髮過後,務必把染髮劑徹底清洗乾淨,以免化學物殘留喺皮膚上。

更多文章:十大徵狀表示孕婦需「清胎毒」!信民間偏方有機會早產?

編:對於孕期染髮,葉醫生又有無其他建議比各位孕媽媽呢?

葉醫生:其實孕婦懷孕期間會發現皮膚特別敏感,有時候連一路以來使用嘅產品都會突然間敏感起來。染髮劑化學成份比較多,而一啲草本染髮劑也都唔代表唔會引致敏感。我自己作為過來人,實在明白敏感之苦,所以如非必要的話,我並不是太建議孕媽媽去染髮。


相關文章

緊貼新冠肺炎最新相關資訊